Atyraý oblysynda aýdandyq ákimdik kóshetti úsh ese qymbatqa satyp almaq bolǵan
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, bul derek monıtorıng kezinde anyqtalǵan.
«Sybaılas jemqorlyqpen kúres qyzmetiniń eriktileri memlekettik satyp alý portalyna monıtorıng júrgizdi. Taldaý barysynda Maqat aýdany ákiminiń apparaty kóshet satyp alý baǵasyn úsh esege kótergeni anyqtaldy. Ár túp kóshetti 15 myń teńgeden satyp alýdy josparlaǵan. Kóshettiń naryqtaǵy baǵasy – 5 myń teńge. Al, aýdandyq ákimdik bul maqsatqa 1,5 mln teńge bólgen», -dep habarlady óńirlik departamenttiń baspasóz qyzmeti.
Eriktiler atalǵan derekti tıisti is-shara qabyldaý úshin oblystyq departamentke joldaǵan. Al, departament Maqat aýdany ákiminiń apparatyna memlekettik satyp alýdy qaıta qaraý týraly usynys berdi. Sonyń nátıjesinde kóshet satyp alýǵa qatysty jarııalanǵan lot joıyldy.
Eske sala ketelik, buǵan deıin Sybaılas jemqorlyqqa qarsy volonterliktiń Atyraýdaǵy alǵashqy nátıjesi týraly jazǵan edik.
Atyraý volonterleri Isataı aýdanynyń ortalyǵy – Aqqystaý aýylyndaǵy kentishilik joldardy qaıta jańartý kezinde bıýdjet qarajatynyń tıimsiz jumsalǵanyn anyqtady. Isataı aýdany ákimdiginiń laýazymdy tulǵalary Isataı aýdandyq TKSh bólimi men «Informstroıservıs» JShS arasynda kentishilik joldardy rekonstrýktsııalaýǵa 1,4 mlrd teńge somaǵa jasalǵan qoldanystaǵy shart sheńberinde atqarǵan jumysy týraly jalǵan aktilerge qol qoıǵan.