Atyraý oblysynda áskerden búgin oralǵan 4 jigit birden daýys berýge keldi

ATYRAÝ. QazAqparat – Atyraý oblysynda áskerden oralǵan 4 jigit úıine barmastan buryn daýys berdi, dep habarlaıdy QazAqparat tilshisi.

Eltaı Esenamanov, Jandos Qabdolov, Aıbek Amantaev pen Erasyl Batyrbekuly áskerden oraldy. Sarbaz kıimin sheship úlgermegen jigitter Mahambet aýdanyndaǵy týǵan aýyly – Sarytoǵaıdaǵy úıine birden barǵan joq. Aldymen, daýys berý úshin №220 referendým ýchaskesine bardy.

«Biz Nur-Sultan qalasyndaǵy №5573 áskerı bóliminde boryshymyzdy ótedik. Áskerde júrip, búkilhalyqtyq referendým ótetininen habardar boldyq. Referendým arqyly Konstıtýtsııaǵa engiziletin ózgeristerdi de bilemiz. Endi mine, týǵan aýylymyzǵa oralǵan sátimiz referendým ótetin kúnge sáıkes kelgenine qýandyq. Tórteýmiz jolda kele jatyp, aýylǵa jetken soń birden úıimizge emes, daýys berý ýchaskesine baramyz dep kelisken edik. Ýádeniń aty – ýáde. Bir-birimizge bergen ýádemizdi oryndaıyq dep, birden referendým ýchaskesine kelip turmyz. Maqsatymyz da, armanymyz da bir», -deıdi áskerden oralǵan jigitterdiń biri Eltaı Esenamanov.

Sarytoǵaı aýylyndaǵy №220 referendým ýchaskesinde 1020 daýys berýshi tirkelgen. Túske deıin munda 620 adam daýys berip úlgergen. Al, 34 adamnyń úıine ýchaskelik komıssııa músheleri referendým bıýlleteni men jáshigin apardy.

Eske sala ketelik, buǵan deıin Atyraý perzenthanasynda jas bosanǵan analar daýys bergenin, keıin jabyq ýchaskeniń birinde daýys berý aıaqtalǵanyn jazǵan bolatynbyz.