Atyraý oblysynda Altyn Orda kezeńindegi qundy jádigerler tabyldy
Atyraý oblystyq mádenıet, tilderdi damytý jáne arhıv isi basqarmasynyń bólim basshysy Mıra Dáýletbaevanyń málimetine súıensek, oblystyq tarıhı ólketaný mýzeıiniń uıymdastyrǵan arheologııalyq qazba jumysy 29 mamyr-17 shilde aralyǵynda júrgizilgen.
«Zertteý jumystary kezinde kerýen saraıdyń qaqpa bóligi, 14 bólme, 3 Sýfa munarasy, tandyr oshaqtyń peshteri tolyqtaı ashyldy. Jalpy kólemi 800 sharshy metr aýmaǵynan topyraq alyndy. Bul tarıhı keshen Altyn Orda dáýirinde Saraıshyq qalashyǵynan shyǵyp, Ortalyq Azııaǵa baǵyt alǵan saýda kerýenderine qyzmet kórsetken. Kerýen saraıdyń aýmaǵynan 4 kúmis, 26 qola moneta shyqty. Toqtamys han men Ózbek han dáýirindegi keramıkalyq ydystardyń fragmentteri, monshaq jáne shyǵyr bólikteri, ártúrli izder qalǵan standartty kirpish tastar anyqtaldy. «Taskeshý» kerýen saraıynan soltústikke qaraı 1,5 shaqyrym jerde Altyn Orda kezeńindegi mekenjaılar, úılerdiń orny, Altyn Orda handaryna tıesili 5 kúmis teńge, qola tıyndar tabyldy», -dedi Mıra Dáýletbaeva.
Al, ortaǵasyrlyq Saraıshyq qalashyǵynda 700 sharshy metr aýmaqta arheologııalyq zertteý jumystaryn júrgizý «Bozoq» memlekettik tarıhı-mádenı mýzeı-qoryǵy RMQK-ǵa tapsyrylǵan. Jumystyń oryndalý merzimi – shartqa qol qoıǵan kúnnen bastap 60 kún.
Sondaı-aq, Qyzylqoǵa aýdanyndaǵy Qaraqudyq-1, Qaraqudyq-2 qorǵandarynda «Nursat» jeke kásipkerligi qazba jumystaryn júrgizip jatyr. Osy aýdandaǵy Qarabaý-2 qorǵanyna arheologııalyq zertteý júrgizý úshin konkýrs jarııalaý josparlanyp otyr.
Eske sala ketelik, buǵan deıin Saraıshyq qalashyǵynyń ornynan noǵaı-qazaq kezeńindegi monsha tabylǵanyn jazǵan edik.