Atyraý oblysynda Altyn Orda dáýirindegi kóne qalashyqtyń orny tabyldy

ATYRAÝ. QazAqparat – Atyraý oblysynyń Mahambet aýdanynda kóne qalashyqtyń orny tabyldy. Ǵalymdar ony Altyn Orda dáýirindegi qalashyq bolýy múmkin degen boljam jasap otyr, dep habarlaıdy QazAqparat tilshisi.

Kóne meken Saraıshyq qalashyǵynan 25 shaqyrym jerde ornalasqan. Aýmaǵy – 100 gektar. Qalashyq ornynda «Saraıshyq» memlekettik mýzeı-qoryǵynyń ǵalymdary arheologııalyq qazba jumystaryn júrgizip jatyr. Oǵan Reseıden kelgen ǵalymdar da tartylǵan.

Arheologter kóne qalashyqty zertteý maqsatyndaǵy qazba jumysy kezinde mazarǵa uqsas nysandy tapqan. Onyń irgetasy, tómengi qabaty sol kúıinde saqtalǵan.

«Bul mekennen qysh qumyralar, tıyndar, orta ǵasyrdaǵy jádigerler, HІV ǵasyrdyń tıyndary tabylyp otyr. Bul – Qazaqstan tarıhyna qosylǵan zor úles», - deıdi «Saraıshyq» memlekettik mýzeı-qoryǵynyń dırektory Ábilseıit Muhtar.

Tarıh ǵylymdarynyń doktory, professor Madııar Eleýovtiń aıtýyna qaraǵanda, keıingi eki jylda 10 shaqty qalashyq pen eldi mekenniń orny ashylǵan. Sol qalashyqtar arqyly Uly Jibek joly boıyndaǵy Saraıshyq qalashyǵynan úsh baǵytqa shyǵatyn kerýen baǵyty anyqtalyp otyr.

«Qazir Qaraǵaıly degen jerden shaǵyn kóne qalashyqtyń orny tabyldy. Jerdiń betinde jatqan kóne zattardyń synyqtaryna qaraǵanda, bul mekendi Altyn dáýirindegi qazaq handyǵynyń qalashyǵy dep topshylaýǵa bolady», -deıdi Madııar Eleýov.

Eske sala ketelik, budan buryn Atyraý oblysynda oǵyz-qypshaq dáýirindegi balbal tas, keıin kóne qorǵannan sarmat dáýirindegi jádigerler tabylǵanyn habarlaǵan edik.