Atyraý oblysynda Altyn belgi úmitkerleriniń sany 40% artty

ATYRAÝ. QazAqparat – Atyraý oblysynda 244 túlek «Altyn belgi» alýǵa úmitti bolyp otyr, dep habarlaıdy QazAqparat.

Oblystyq bilim basqarmasy basshysynyń mindetin atqarýshy Aınagúl Dúısekenovanyń málimetine súıensek, búgin 200 mektepte sońǵy qońyraý soǵyldy.

«Bıyl Atyraý oblysynda 11-synypty 5999 túlek aıaqtady. Onyń ishinde 4 789 túlek ulttyq biryńǵaı testileýge qatysýǵa ótinish berdi. Mektep túlekteriniń arasynda «Altyn belgiden» úmitker 244 oqýshy bar. Al, 243 úmitker «Úzdik attestat» alýy múmkin. Ótken jylmen salystyrǵanda óńirde «Altyn belgiden» úmitkerler sany 40% artty», -deıdi Aınagúl Dúısekenova.

Onyń aıtýynsha, Prezıdent tapsyrmasyna sáıkes mektep bitirýshilerge bólinetin grant túrli kásiptik, tehnıkalyq baǵyttaǵy mamandyqtardy qamtyp otyr.

«Osyǵan baılanysty Abaı ortalyǵynda túlekterge arnalǵan «Ashyq esik» kúnin ótkizdik. Oǵan Astana ІT ýnıversıteti, E.Bóketov atyndaǵy Qaraǵandy ýnıversıteti, D.Serikbaev atyndaǵy Shyǵys Qazaqstan tehnıkalyq ýnıversıteti, Súleımen Demırel ýnıversıteti jáne Sh.Ýálıhanov atyndaǵy Kókshetaý ýnıversıtetiniń ókilderi qatysty. Mektep túlekteri mamandyq tańdaýdyń mańyzy, zamanaýı mamandyqtar týraly aqparattarmen tanysyp, tolyq maǵlumat aldy», -dep málim etti Aınagúl Dúısekenova.

Mektep túlekteriniń arasynda sheteldik joǵary oqý oryndarynan shaqyrtý alǵandar da bar.

Máselen, Atyraý qalasyndaǵy Nazarbaev zııatkerlik mektebiniń 12-synyp oqýshylary shetel ýnıversıtetteriniń bilim grantyn jeńip alǵan.

«Bizdiń mekteptiń bıylǵy túlekteri Nursultan Jańabaı AQSh-taǵy Drexel University-niń Chemical Engineering mamandyǵyna, Mádına Daıardıeva Vengrııadaǵy Budapest Business School University of Applied Sciences ýnıversıtetiniń Business Administration and Management fakýltetinde oqý grantyn utyp aldy. Al, Aman Bekmuratovqa sheteldiń 5 ýnıversıtetinen shaqyrtý keldi. Ony bilim alýǵa shaqyrǵan joǵary oqý oryndarynyń qatarynda Miami University, Marian University, Colorado State University, Jacobs University Bremen, La Sapienza University bar», -dep habarlady zııatkerlik mekteptiń baspasóz qyzmeti.

Eske sala ketelik, buǵan deıin atyraýlyq oqýshy oqýshy halyqaralyq STEM olımpıadasynyń kúmis medaline ıe bolǵanyn jazǵan edik.