Atyraý oblysynda áleýmettik nysandar men jol salýǵa 11 mlrd teńgeden astam qarjy bólindi

NUR-SULTAN. QazAqparat - Atyraý oblysynda «Aýyl-El besigi» jobasy boıynsha jańa áleýmettik nysandar men jol salýǵa 11 mlrd. teńgeden astam qarajat bólindi, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine silteme jasap.

Atyraý oblysyna jumys sapary barysynda Ulttyq ekonomıka vıtse-mınıstri Baýyrjan Omarbekov «Aýyl-El besigi» jobasy iske asyrylyp jatqan eldi mekenderge baryp, Qulsary qalasyn damytý máseleleri jónindegi jıynǵa qatysty.

Vıtse-mınıstr atap ótkendeı, sońǵy 10 jylda Qulsary qalasynyń ınfraqurylymyn damytýǵa shamamen 10 mlrd. teńge bólindi. Alaıda, onyń aıtýynsha, qaladaǵy birqatar problemalar sheshilmegen.

«Olardyń arasynda sý men joldar máseleleri bar. Jalpy, qala ınfraqurylymyn jaqsartýǵa jetkilikti qarajat bólinip jatyr. Bul qalanyń eń ótkir problemalaryn sheshýge múmkindik berdi», - dedi B.Omarbekov.

Sonymen qatar, ol qalada eńbek naryǵyndaǵy jáne ShOB damýyndaǵy teris úrdisterdi, jumyspen qamtylǵandar sanynyń, sondaı-aq qurylys jumystary kóleminiń tómendeýin atap ótti.

Óz kezeginde Jylyoı aýdanynyń ákimi Jumabek Qarajanov qalada emhanalar, balabaqshalar, mektepter, turǵyn úıler, sý qubyrlary men joldar salý boıynsha jobalardy iske asyrý josparlanǵany týraly baıandady.

Sondaı-aq, vıtse-mınıstr Atyraý oblysynyń áleýmettik-ekonomıkalyq damýynyń keshendi josparyn iske asyrýǵa arnalǵan keńeske qatysty. Nátıjesinde jergilikti bılik organdaryna 2022 jylǵa josparlanǵan is-sharalardy sapaly oryndaý boıynsha usynystar berildi.

Keıin vıtse-mınıstr «Ulttyq ındýstrııalyq munaı-hımııa tehnoparki» AEA aýmaǵynda ornalasqan gaz-hımııa kesheni qurylysynyń barysymen tanysty. Jyl saıyn munda 500 myń tonnaǵa deıin ónim shyǵarý josparlanyp otyr. Qurylǵan sátten bastap arnaıy ekonomıkalyq aımaqqa 1,1 trln. teńge kóleminde ınvestıtsııalar tartylyp, myńnan astam turaqty jumys oryndary quryldy.

Atyraý qalasynda Balyqshy shaǵynaýdannan Zaroslyı aýylyna deıin avtomobıl jolyn qaıta qurý boıynsha jumystary jalǵasýda. Onyń jalpy uzyndyǵy 5,7 km. Nátıjesinde, bul kólik qatynasynyń sapasyn arttyrýǵa, ótkizý qabiletin jaqsartýǵa múmkindik beredi. Jalpy quny 3,6 mlrd. teńge bolatyn joba osy jyldyń sońyna deıin paıdalanýǵa beriledi dep josparlanýda.

Jumys sapary barysynda B.Omarbekov Atyraý oblysynda «Aýyl – El besigi» jobasynyń júzege asyrylý barysymen tanysty.

Mahambet aýylynda ol 600 oryndyq mektep-ınternattyń qurylysymen tanysty. Bilim uıasy 2023 jyldyń sáýir aıynda paıdalanýǵa beriledi dep josparlanýda. Jańa mektepte fýtbol alańy, basketbol, voleıbol, gımnastıka jáne tennıske arnalǵan sport zaldary salynady.

Bıyl Atyraý oblysynyń 30 aýylynda 41 jobany iske asyrýǵa 11,2 mlrd. teńgeden astam qarajat bólindi.