Atyraý oblysynda 900-den astam sheteldik kóshi-qon zańnamasyn buzǵan
Atyraý oblystyq polıtsııa departamenti baspasóz qyzmetiniń málimetinshe, bul derek «Mıgrant» jedel profılaktıkalyq is-sharasy kezinde anyqtalǵan.
«Bul is-sharany ótkizýdegi basty maqsat – kóshi-qon zańdylyǵyn buzǵan, Qazaqstan Respýblıkasynyń aýmaǵynan óz erkimen shyǵyp ketý týraly sot qaýlylaryn oryndamaǵan sheteldikterdi anyqtaý. Memleket zańdylyǵynyń talabyn oryndamaǵan sheteldikterdi májbúrli túrde elden shyǵarý. Oblys polıtseıleri is-shara kezinde kóshi-qon zańnamasyn buzǵan 900-den astam sheteldikti anyqtady», - dep habarlady departamenttiń baspasóz qyzmeti.
Máselen, 583 sheteldik elimizdiń kóshi-qon zańnamasyn buzǵany úshin QR Ákimshilik quqyq buzýshylyq týraly kodeksiniń 517-babynyń 3, 4, 5, 6 jáne 7-bóligimen ákimshilik jaýapqa tartylǵan. Al, sheteldiń 31 azamatyna atalǵan qujattyń 519-babymen, 372 zańsyz «qonaqqa» 518-babymen ákimshilik hattama toltyrylǵan.
Sondaı-aq, ákimshilik quqyq buzǵan 31 sheteldik azamattyq is júrgizý jáne ákimshilik tártibimen el aýmaǵynan shyǵarylǵan. Al, jeke basyn anyqtaıtyn qujattardyń bolmaýyna baılanysty Ózbekstan Respýblıkasynyń 91 azamaty qabyldaý-taratý ornyna ornalastyrylǵan.
Eske sala ketelik, budan buryn ózbekstandyq qarııa Atyraýda 21 jyl boıy qujatsyz júrgenin jazǵan edik. Ózbekstan Respýblıkasynyń 72 jastaǵy azamaty Qazaqstanǵa 2000 jyldary kelgen. Qazaqstandyq áıelmen otbasyn qurǵan. Erli-zaıyptylardyń ortaq bes balasy bar. Polıtseıler sheteldiktiń jeke basyn anyqtap, eline qaıtarý úshin tıisti qujattar tizbesin Ózbekstan Respýblıkasynyń Aqtaý qalasyndaǵy bas konsýldyǵyna joldady.
Keıin Atyraý oblysynda 13 jyldan beri qujatsyz júrgen ózbekstandyq anyqtaldy.
Sheteldik áıeldiń Qazaqstan Respýblıkasynyń aýmaǵyna 2010 jyldary kirgenin anyqtady. Sodan beri qujatynyń elde bolý merzimi bitkenin bile tura, Qazaqstan aýmaǵynan shyǵyp ketpegen. Qazaqstan azamatyna kúıeýge tıip, eki balany dúnıege ákelgen. Jınaqtalǵan is-qujattary Qyzylqoǵa aýdandyq sotyna jiberildi.