Atyraý oblysynda 80-nen astam etnostyń ókili turady
Búgin Atyraýda 1 mamyr Qazaqstan halqy birligi kúnine oraı «Bir shańyraq astynda…» atty mádenı-kópshilik is-shara ótti.
Oǵan qatysqan Atyraý oblysynyń ákimi Serik Shápkenovtiń málimetinshe, qazir munaıly óńirde 80-nen astam etnostyń ókili turady.
«Biz Memleket basshysy Qasym-Jomart Toqaevtyń «Zaman qanshalyqty kúrdeli bolsa da, biz baǵdarymyzdan aınymaımyz. Ótkennen taǵylym alyp, keleshekke senimmen qadam basamyz. Osy jolda jurtymyzǵa, eń aldymen, aýyzbirshilik kerek. Aqyl men sabyr, parasat pen ustamdylyq qajet. Biz ár sheshimdi muqııat saralap, ár isti baıyppen jasaýǵa tıispiz. Otanshyldyq rýhy joǵary el – kózdegen maqsatyna qalaı da jetedi» degen pikirin jadymyzda ustaǵanymyz jón. Óıtkeni, elimiz tek bereke men birliktiń, yntymaq pen qajyrly eńbektiń nátıjesinde alǵa basady. Aldaǵy mindetimiz – áleýmettik-ekonomıkalyq jaǵdaıy jaqsarǵan jańa Qazaqstan qurý. Buǵan birlik pen yntymaqtyń nátıjesinde qol jetkizemiz. Demek, elimizdegi turaqtylyq pen kelisimdi, yrysty yntymaqty baǵalaı bileıik», -dedi Serik Shápkenov.
Ákimniń aıtýynsha, Atyraýda ózge etnostardyń mádenıetin, salt-dástúrin nasıhattaıtyn 19 etnomádenı birlestik jumys isteıdi.
Eske sala ketelik, budan buryn Atyraý oblysyna jyl basynan beri shetelden 36 qandas kóship kelgenin jazǵan bolatynbyz.