Atyraý oblysynda 70 myńǵa jýyq bala jazǵy demalyspen qamtylady
Oblys ákimi Serik Shápkenovtiń tóraǵalyǵymen ótken jıynda kanıkýl kezinde balalardyń saýyqtyrý demalysyn, bos ýaqytyn jáne eńbekpen qamtylýyn uıymdastyrý qaraldy.
Oblys bilim basqarmasynyń basshysy Gúlnar Sádýahasovanyń aıtýynsha, 70 myńǵa jýyq oqýshyny jazǵy demalyspen qamtý kózdelip otyr.
«Onyń ishinde jazǵy mektepke 11 684 oqýshy tartylady. Mahambet aýdanynda ornalasqan «Araı» lagerine 480, Inder aýdanyndaǵy «Jas órken» lagerine 1008 oqýshy barady. Mektepter janynan 7931 oqýshy úshin tamaqtandyratyn lagerler uıymdastyrylady. Inder aýdanyndaǵy 4, Jylyoı, Mahambet, Isataı jáne Qyzylqoǵa aýdanynda bir-birden lager ashylyp, shıpajaı úlgisinde jumys isteıdi. Mektepter janynan 695 tamaqtandyrýsyz, beıindik, debattyq, tildik jáne ІT lagerler ashylyp, onda 26 553 oqýshy qamtylady. Oblys aýmaǵynan tysqary lagerlerde 4 619 oqýshy demalady», -dep málim etti Gúlnar Sádýahasova.
Onyń deregine qaraǵanda, 2 myńǵa jýyq oqýshy tarıhı–ólketaný baǵytynda óńirdegi murajaılarǵa, mádenı-tarıhı oryndarǵa saıahat jasap, týrıstik ekspedıtsııalarǵa qatysady. Qosymsha bilim berý mekemeleri janyndaǵy jazǵy lagerlerde 2 192 bilim alýshy tartylady. Eńbekke baýlý sharalaryna qatysýǵa 9 262 baladan ótinish túsken.
«Shynyn aıtý kerek, balalardyń lagerlerde demalýyna qatysty sheshilmegen máseleler bar. Lagerlerde tamaqtandyrý máselesine muqııat bolý qajet. Ásirese, tez buzylatyn tamaqtardyń saqtaý merzimin qadaǵalaý jón. Áleýmettik turmysy tómen toptaǵy otbasylardyń balalary birinshi kezekte jazǵy demalyspen qamtylýǵa tıis. Balalardyń qaýipsizdigin qamtamasyz etý úshin beınebaqylaý kameralaryn ornatýǵa basa nazar aýdarý kerek», -dedi Serik Shápkenov.
Eske sala ketelik,buǵan deıin bıyl Atyraý oblysynda qansha bala jazǵy lagerde demalatynyn jazǵan bolatynbyz.