Atyraý oblysynda 7 mektep pen 1 japsarjaı paıdalanýǵa beriledi
Atyraý oblysy ákiminiń orynbasary Jasulan Bısembıevtiń aıtýynsha, jyl sońyna deıin 7 mektep pen 1 japsarjaıdy paıdalanýǵa berý kózdelip otyr.
«Mektepter qurylysyna jaýapty jumys tobymen aldaǵy josparlardy pysyqtaǵan bolatynbyz. Jyl aıaǵyna deıin jalpy sany 6 450 orynǵa shaqtalǵan jańa mektepter oqýshylardy qabyldaıdy. Qoldanysqa beriletin jańa mektepterdiń beseýi Atyraý qalasynyń aýmaǵynda ornalasqan. Naqtylaı aıtqanda, Nursaıa, Saryarqa yqshamaýdandaryndaǵy Binom mektepteri, Maǵjan Jumabaev atyndaǵy mekteptiń jańa ǵımaraty, Jańatalap jáne Aqjar aýylynda, Mahambet aýdanynda qurylysy aıaqtalatyn bilim ordasy ashylady. Sonymen birge, Isataı aýdanynyń Tuşyqudyq aýylyndaǵy mekteptiń japsarsaıy qoldanysqa beriledi», - dep habarlady Jasulan Bısembıev.
Ákim orynbasarynyń deregine súıensek, kelesi jyly oblys boıynsha 18 mektepti paıdalanýǵa berý josparlanǵan. Onyń ishinde 9 bilim ordasy «Jaıly mektep» baǵdarlamasymen salynady.
«Osylaısha, Atyraý oblysynda mektepterdegi sabaq eki aýysymda bilim beriletin bolady. Naqtylaı aıtqanda, 2023-2024 jyldary mektepterde oqýshylarǵa 26 myńnan astam oryn qurylady», -dep málim etti Jasulan Bısembıev.
Eske sala ketelik, buǵan deıin Atyraýda byltyrdan beri 3 mektepti kúrdeli jóndeý baıaý júrip jatqanyn jazǵan edik.
Oblystyq bilim berý basqarmasy basshysynyń orynbasary Tilekqabyl Baıdoshevtyń málimetinshe, 10 mektepte kúrdeli jóndeý júrip jatyr.
«Byltyr 6 mektepke kúrdeli jóndeý jumystary júrgizýge 2 mlrd 145 mln teńge qaraldy. Onyń úsheýiniń jóndeý jumystary áli kúnge aıaqtalǵan joq. Al, bıyl 8 mektep, 1 balabaqsha men «Barys» klýby kúrdeli jóndeýden ótedi», - dedi Tilekqabyl Baıdoshev.