Atyraý oblysynda 7 aıda jol apatynan 49 adam kóz jumdy
Jergilikti polıtsııa qyzmeti basqarmasy jol qozǵalysyn qadaǵalaýdy uıymdastyrý tobynyń erekshe tapsyrmalar jónindegi aǵa ınspektory Amanjol Jumalıevtyń málimetinshe, sońǵy 10 kúnde 4 500-ge jýyq jol erejesin buzý deregi anyqtalǵan.
«Atyraý qalasynyń aýmaǵynda 1 970, qala syrtyndaǵy tas joldarda 1 452, Jylyoı aýdanynda 254, Qurmanǵazyda 182, Mahambette 173, Isataıda 148, Qyzylqoǵada 103, Inderde 97, Maqat aýdanynda 84 jol júrý erejesin buzý deregi tirkeldi. Jyl basynan bergi 7 aıda 184 jol-kólik oqıǵasy tirkelip, 49 adam qaza tapty. Jol apatynan 227 adam ár túrli dene jaraqatyn aldy. Ótken jylmen salystyrǵanda, jol-kólik oqıǵasy 17,9%-ǵa ósip otyr», -deıdi Amanjol Jumalıev.
Onyń aıtýyna qaraǵanda, «Qaýipsiz jol» jedel profılaktıkalyq is-sharasy bastalǵan 10 kún ishinde 3 jol-kólik oqıǵasy bolǵan. Atyraý qalasy aýmaǵynda tirkelgen jol apatynan 2 adam túrli dene jaraqatyn alǵan. Al, respýblıkalyq mańyzy bar Atyraý-Oral tas jolynyń 19-shaqyrymynda eki avtokólik soqtyǵysyp, saldarynan 3 adam jantásilim etken.
«Qoǵamdyq tártipti saqtaý jáne jol qaýipsizdigin qamtamasyz etý maqsatynda joldarǵa «Sergek» júıesiniń kamerasyn ornatý máselesi týyndap otyr. Osyǵan oraı, «Kórkem Telekom» JShS-niń qyzmetkerlerimen birge talqylap, qala syrtyndaǵy respýblıkalyq mańyzy bar Aqtóbe-Atyraý-Astrahan, Atyraý-Oral, Dossor-Qulsary-Beıneý jáne oblystyq mańyzy bar Atyraý-Inder, Inder-Qarabaý-Mııaly-Saǵyz tas joldaryna «Sergek» kamerasyn ornatýdy jedeltetý talqylandy», - dep málim etti Amanjol Jumalıev.
Eske sala ketelik, buǵan deıin Atyraý oblysynda eki kólik soqtyǵysyp, úsh adam mert bolǵanyn habarlaǵan edik.