Atyraý oblysynda 64 mektepte beınebaqylaý kamerasy iske qosylmaǵan

ATYRAÝ. QazAqparat – Atyraý oblysynda 64 mektepte beınebaqylaý kamerasy qosylmaǵan, dep habarlaıdy QazAqparat tilshisi.

Atyraý oblystyq ákimdiginiń otyrysynda bilim nysandarynyń tehnıkalyq qaýipsizdigi týraly másele qaraldy.

Oblystyq bilim basqarmasynyń basshysy Gúlnar Sadýahasovanyń aıtýynsha, bilim nysandaryn ınjenerlik-tehnıkalyq jabdyqpen jaraqtandyrý úshin úsh topqa bólingen.

«Birinshi toptaǵy nysandar beınebaqylaý kamerasymen jáne habardar etý júıesimen 100% qamtyldy. Ekinshi jáne úshinshi toptaǵy nysanǵa jatatyn 146 mektep beınekameramen, týrnıketpen 100% jabdyqtaldy. Óńirdegi 93 mekteptiń beınekameralary jedel basqarý ortalyǵy arqyly baqylanady. Al, 138 mektep dabyl túımesimen 89% qamtyldy. Mamandandyrylǵan kúzet júıesine 64 mekteptiń dabyl túımesi qosyldy. Jedel basqarý ortalyǵyna 8 mekteptiń dabyl túımesin qyrkúıekke deıin qosylady. Bul jumysqa suralǵan qarjy oblystyq máslıhat sessııasynda qaralady», -dedi Gúlnar Sadýahasova.

Onyń aıtýynsha, mektepterdiń qaýipsizdigin tekserý úshin 5 monıtorıng toby qurylǵan. Qazir 64 mekteptiń beınebaqylaý kamerasy qosylmaǵany anyqtalǵan.

«Mekteptegi qaýipsizdikti qamtamasyz etý maqsatynda beınekamera ornatý talaptaryn bir baǵdarlama júıesine engizý kerek. Beınebaqylaý júıesine qosylmaǵan mektepterge kameramen tolyq qamtý úshin qarajat qarastyraıyq. Negizdemeniń bári jasaqtalsa, qarajat bólinedi. Internet, dabyl túımesi, beınekamerasy da iske qosylyp, jumys isteýi qajet. Biraq, qaǵaz júzinde emes», -dedi oblys ákimi Serik Shápkenov.

Eske sala ketelik, buǵan deıin Atyraý mektepteriniń kúzetine eki jylda 88 mln teńge jumsalǵanyn jazǵan bolatynbyz.

Keıin Atyraý mektepteriniń qaýipsizdik deńgeıi bir aı boıy tekseriletinin habarlaǵan edik.