Atyraý oblysynda 500-ge jýyq muǵalim jetispeıdi
«Biz osy másele boıynsha jumys atqaryp jatyrmyz. Oblystyń birqatar oqý oryndaryn araladyq. Bıyl 174 jas maman keledi dep josparlanyp otyr»,- dedi oblystyq bilim basqarmasy basshysynyń mindetin atqarýshy Jansulý Tóremuratova.
Óńir ákimi Nurlan Noǵaev maman tapshylyǵy jaǵdaıynda Qazaqstannyń ózge oblystarynan tájirıbeli pedagogtardy shaqyrtý kerektigin aıtty.
«Qajetti mamandardy óńirimizge shaqyryńyzdar. Biz olarǵa barlyq jaǵdaıdy jasap, úımen qamtamasyz etýge daıynbyz. Bul mektep dırektorlaryna da qatysty. Konkýrs jarııalap, tájirıbeli maman qoıyńdar. Eshkim sizderge kedergi keltirip, qarsy tura almaıdy»,- dep atap ótti aımaq basshysy.
Atyraý oblysy ákiminiń aıtýynsha, maman izdeý jumysyn bilim basqarmasy ǵana emes, barlyq deńgeıdegi ákimder de júzege asyrýy tıis. Osyndaı jaǵdaıda ǵana másele óz sheshimin tabady. Ol sondaı-aq oqý oryndaryndaǵy jóndeý jumystaryn ýaqytynda aıaqtaýdy tapsyryp, oqý protsesine kedergi jasamaý kerektigin aıtty.
Jıynda jazǵy demalys taqyryby da qozǵaldy, Nurlan Noǵaev oqý lagerlerin balalarǵa tabıǵı qolaıly jaǵdaı jasalǵan jerlerde ótkizýdi júktedi.