Atyraý oblysynda 500-den astam adam nashaqorlyq esebinde tur
Oblystyq densaýlyq saqtaý basqarmasynyń baspasóz qyzmetinen málim etkendeı, nashaqorlar esebine 508 adam alynǵan.
«Onyń ishinde 68 adam esirtkilik ýyty bar tramadol dárisine táýeldi bolǵan. Qazir oblystyq psıhıkalyq densaýlyq ortalyǵynyń narkologııa bólimshesinde 75 adam tıisti emdeý sharasyn alyp jatyr. Úsh adamǵa májbúrli emdeý júrgizilýde», -deıdi ortalyq dırektory Eldos Qydyrsıyqov.
Al, oblystyq polıtsııa departamenti baspasóz qyzmetiniń aqparatyna qaraǵanda, turǵyndar tarapynan psıhotropty dári-dármektiń zańsyz aınalymyna qatysty shaǵym kóbeıgen. Turǵyndardyń shaǵymynan keıin jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaev pen ýchaskelik polıtsııa ınspektorlary Atyraý qalasyndaǵy «Bereke» shaǵyn aýdanynda tekserý júrgizgen.
«Tekserý kezinde atalǵan shaǵyn aýdanda ornalasqan kópqabatty turǵyn úıdiń 2 páterinen psıhotropty dári-dármek tutynǵan 6 turǵyn ustaldy. Inspektorlar 1991, 1992, 1993, 1995, 1995 jáne 1998 jylǵy turǵyndardy saraptamaǵa jetkizdi. Olarǵa qatysty tıisti is-qujattary jınaqtaldy», -dep habarlady departamenttiń baspasóz qyzmeti.
Eske sala ketelik, budan buryn Atyraýda sońǵy 2 jylda 18 myń danadan astam psıhotropty dári tárkilengenin jazǵan edik.
«2021 jyly 9 adam ustalyp, olardan 5 135 dana tramadol, trapıkomed alyndy. Al, byltyr 17 adamnan 7 800, bıylǵy jyl basynan beri 9 adamnan 3 596 dana taramadol, tropıkamed, somnol, alıs dári-dármekteri tárkilendi», -dep málim etken edi departamenttiń baspasóz qyzmetinen.