Atyraý oblysynda 45 jańa joba qatarǵa qosyldy

ATYRAÝ. QazAqparat - Atyraý oblysynda jańadan 45 joba qatarǵa qosyldy. Bul týraly búgin aımaqtyq kommýnıkatsııalar qyzmetinde «100 naqty qadam» Ult josparynyń júzege asyrylý barysy týraly aıta kele, Atyraý oblysynyń ákimi Nurlan Noǵaev málim etti.

«Jańa ınvestıtsııalyq jobalar munaı hımııa ónerkásibi salasynda, mashına qurastyrý, qurylys ındýstrııasy, farmatsevtıka, sondaı-aq, aýyl sharýashylyǵy ónimderin qaıta óńdeý jónindegi agronerkásiptik keshen salasynda júzege asyryldy. Jobalardyń jalpy quny 101 mlrd teńge. 45 jobany qatarǵa qosýdyń arqasynda 3 328 turaqty jumys ornyn ashtyq. Qazirgi jáne jańa jobalarǵa ınvestıtsııa tartý jumysy odan ári jalǵasýda», - dedi aımaq basshysy.

N.Noǵaevtyń málimetinshe, qazir Atyraý oblysy  álemniń jeti elindegi 11 kompanııamen kelissózder júrgizip jatyr. Mańyzdy  jobalardyń qatarynda kún jáne jel elektr stansalarynyń qurylysy, farmatsevtıkalyq zaýyt pen gaz-hımııa salasyndaǵy jobalar bar.