Atyraý oblysynda 4 aıda 1,44 trln teńge salyq tústi
Atyraý oblystyq Memlekettik kirister departamentiniń ókili Álııa Baıtemirovanyń aıtýynsha, jyl saıyn túsiminiń óskeni baıqalady.
«Máselen, byltyrǵy mamyr aıyna deıin qazynaǵa 1 trln 9 mln teńge salyq túsken edi. Al, bıylǵy 4 aıda 1 trln 44 mln teńge tústi. Salyqtyń kóp bóligin oblysta jumys isteıtin iri munaı kompanııalary tólep otyr. Osyndaı kompanııalardyń sany artsa, demek salyq túsimderi de molaıady», -deıdi Álııa Baıtemirova.
Onyń aıtýyna qaraǵanda, munaı-gaz kompanııalarynyń tenderin jergilikti kásiporyndar utyp alsa, bul salyq kóleminiń ulǵaıýyna áser etedi. Sonda ǵana salyq jergilikti jáne respýblıkalyq bıýdjetke aýdarylady.
«Qarapaıym mysal retinde mynany aıtýǵa bolady. Jańa qurylǵan kompanııadan nemese ashylǵan jańa jumys ornynan ekonomıkaǵa oń áser bolady. Óıtkeni, tólengen salyqtyń nátıjesinde túrli salada jańa nysandar boı kóteredi. Máselen, mektep, ne ózge de áleýmettik nysan salynýy múmkin. Demek, salyq túsimi kóbeıgen saıyn, turǵyndardyń qolaıly ómir súrýine jaǵdaı jasalady», - deıdi Álııa Baıtemirova.
Al, sarapshy Abzal Narymbetovtiń pikirine súıensek, elimiz úshin munaı gaz operatorlaryna qyzmet kórsetýdi jergilikti kompanııalar utyp alǵany tıimdi bolady.
«Elimizdegi munaı-gaz kompanııalaryndaǵy qazaqstandyq qamtý úlesin arttyrýǵa basa mán berilýge tıis. Jergilikti mamandar biliktiligin arttyrady. Otandyq mamandar shoǵyry qalyptasady. Qazaqstandyq mamandar aımaqtyń, eldiń ekonomıkasyna úlesin qosady. Otandyq taýarlar sapasy artady. Eń bastysy, calyq jáne basqa da tólemder ózimizde qalady», - deıdi Abzal Narymbetov.
Eske sala ketelik, budan buryn 25 myńǵa jýyq atyraýlyq 580 mln teńgeden astam salyǵyn tólemeı júrgenin jazǵan edik.