Atyraý oblysynda 37 jańa mektep salynady
«Jalpy, óńirdiń damý barysyn jáne barlyq máselelerdiń ýaqtyly sheshilýin ózim tikeleı baqylaýda ustaımyn. Meniń tapsyrmam boıynsha Atyraý oblysynyń 2025 jylǵa deıingi áleýmettik-ekonomıkalyq damýy týraly keshendi jospardyń jobasy daıyndaldy. Soǵan sáıkes 23 myń oqýshyǵa arnalǵan 37 jańa mektep salynady. Sonyń arqasynda úsh aýysymda oqytý jáne mektepterdegi oryn tapshylyǵy máselesin tolyq sheshemiz», - dedi QR Prezıdenti.
Memleket basshysynyń atap ótýinshe, jergilikti turǵyndarǵa sapaly medıtsınalyq kómek kórsetý úshin birqatar nysannyń qurylysy bastalady. Atap aıtqanda, kópbeıindi aýrýhana, eki emhana, psıhıkalyq densaýlyq ortalyǵy, Atyraý qalasyndaǵy onkologııalyq dıspanser janynan radıologııalyq korpýs, sondaı-aq aýyldyq jerlerde alǵashqy dárigerlik-sanıtarlyq kómek kórsetetin 9 nysan boı kóteredi. Múmkindigi shekteýli balalar úshin ońaltý ortalyǵy salynady. Budan bólek, 3,5 mıllıon sharshy metr turǵyn úı paıdalanýǵa beriledi. Sonyń nátıjesinde 25 myń atyraýlyq otbasy jańa baspanaǵa ıe bolady.
«Jalpy, Keshendi jospardyń júzege asyrylýy ónerkásipti, agroónerkásip keshenin, týrızm salasyn damytýǵa, energetıka jáne ekologııa salasyndaǵy aımaqta qordalanǵan máselelerdi sheshýge múmkindik beredi. Ony iske asyrý úshin 9 trıllıon teńgege jýyq ınvestıtsııa tartylmaq, kóbi – jeke ınvestıtsııa. Sonymen qatar, josparǵa sáıkes bıýdjetten 800 mıllıard teńgeden astam qarajat bólý kózdelip otyr. Sonyń 700 mıllıardqa jýyǵy respýblıkalyq bıýdjetten qarastyrylady. Másele – bólingen qarajatty tıimdi jumsaýda. Bul – Úkimettiń jáne ákimdiktiń basty jumystarynyń biri. Úkimetke búgingi jıynnyń qorytyndysy boıynsha jospardy tolyqtyryp, 1 aıdyń ishinde bekitýdi tapsyramyn. Basty maqsat – halyqtyń turmys sapasyn jáne ál-aýqatyn arttyrý. Bul jospar bizdiń udaıy baqylaýymyzda bolady», - dedi Qasym-Jomart Toqaev.