Atyraý oblysynda 369 naýqas koronavırýsten emdelip jatyr

ATYRAÝ. QazAqparat – Atyraý oblysynda 369 naýqas koronavırýstan emdelip jatyr. Onyń ishinde 190 adam úı jaǵdaıynda, al, ınfektsııalyq statsıonarlarda 179 patsıent oqshaýlanǵan, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, ótken táýlikte qaýipti vırýsty 22 adam juqtyrǵan. Bul táýlikte Atyraý qalasynda 18 naýqas tirkelgen. Al, Teńiz kenishinde 2 jumysshy, Jylyoı aýdanynda 2 adam koronavırýs ınfektsııasyna shaldyqqan.

«Qazir úı jaǵdaıynda 190 adam em-dom qabyldaýda. Óńirdegi 730 oryndyq ınfektsııalyq statsıonarlarda 179 naýqas emdelip jatyr. Mundaǵy júkteme – 24,5 paıyz. Modýldik aýrýhanada – 104, Teńiz kenishindegi statsıonarda – 47, aýdandardaǵy ınfektsııalyq statsıonarlarda – 23, al, №2 oblystyq aýrýhanada 5 patsıent oqshaýlanǵan» -dep málim etti basqarmanyń baspasóz qyzmetinen.

Sondaı-aq, 75 tósek-orynǵa arnalǵan jansaqtaý bóliminde jaǵdaıy aýyr 14 naýqas jatyr. Jaǵdaıy óte aýyr 2 patsıent ókpeni jasandy jeldetý apparatyna qosylǵan. Bul bólimdegi júkteme 18,7%-dy qurap otyr.

Eske sala ketelik, buǵan deıin Atyraý oblysynda koronavırýs juqtyrǵan 13 naýqas jansaqtaý bóliminde jatqanyn jazǵan bolatynbyz.