Atyraý oblysynda 363 adam ózin bankrot dep jarııalaýdy surap ótinish berdi

ATYRAÝ. QazAqparat – Atyraý oblysynda 363 adamnan ózin bankrot dep taný týraly ótinish túsken, dep habarlaıdy QazAqparat tilshisi.

Atyraý oblystyq memlekettik kirister departamentiniń basshysy Aıdyn Saýdanbekovtiń málimetinshe, ótinishti eGov.kz portaly men eGov Mobile, Salyq Azamat qosymshalarynda, sondaı-aq halyqqa qyzmet kórsetý ortalyǵynda qaǵaz túrinde berýge bolady.

«Bankrottyqqa aryzdy berer aldynda bankter, mıkroqarjy uıymdary, kollektorlyq agenttikter aldyndaǵy bereshek 5,5 mln teńgeden aspaýy jáne keshiktirý merzimi 12 aıdan kem bolmaýy kerek. Múlikke, onyń ishinde ortaq menshiktegi múlikke menshik quqyǵy bolmaýy qajet. Atyraý oblysynda 3 naýryzda bankrottyq týraly sottan tys 70 ótinish túsken. Alǵashqy ótinish elektrondy úkimet portaly arqyly Atyraý qalasynan jergilikti ýaqytpen saǵat 09:05-te tústi», -dep habarlady Aıdyn Saýdanbekov.

Onyń aıtýyna qaraǵanda, aryzǵa kredıtormen (ekinshi deńgeıdegi bankpen nemese mıkroqarjy uıymymen) qaryzdy retteý týraly qujat qosa beriledi.

Alty aı boıy ataýly áleýmettik kómek alǵan ótinim berýshiler 12 aıǵa keshiktirý merzimin esepke almaı, osy rásimdi qoldanýǵa aryz bere alady.

«Alaıda, bankrot dep tanylǵandarǵa lombardtan mıkronesıe alýdy qospaǵanda, 5 jyl ishinde qaryz jáne nesıe alýǵa tyıym salynady. Al qaıtadan bankrottyqqa 7 jyldan keıin ǵana ótinish berýge bolady. Bankrot dep tanylǵandardyń qarjylyq jaǵdaıyna 3jyl boıy monıtorıng júrgiziledi», -dep málim etti Aıdyn Saýdanbekov.

Eske sala ketelik, budan buryn Atyraýlyqtar kólikke 355 mln teńge salyq tólemegenin habarlaǵan bolatynbyz.