Atyraý oblysynda 31 orta mektepte dırektordyń orny bos tur
Oblystyq bilim basqarmasynyń baspasóz qyzmetinen málim etkendeı, bul mektepterdiń basshylarynyń bir toby zeınetke, keıbiri qyzmetinen óz erkimen ketken
«Qazir Atyraý oblysynda jalpy orta bilim beretin 31mekteptiń dırektorlarynyń orny bos tur. Onyń ishinde oblys ortalyǵy – Atyraý qalasynda 9, Jylyoı aýdanynda 1, Isataı aýdanynda 6, Mahambet aýdanynda 4, Qyzylqoǵa aýdanynda 1, Qurmanǵazy aýdanynda 7 bilim ordasy basshylarynyń bos ornyna konkýrs jarııalandy. Aqpan aıynyń 22 kúni kezekti test uıymdastyrylady. Konkýrs nátıjesine sáıkes bos oryndarǵa mektep dırektorlary taǵaıyndalady», -dep habarlady basqarmanyń baspasóz qyzmeti.
Atyraý oblysy ákiminiń orynbasary Jasulan Bısembıevtiń málimetine qaraǵanda, oqýshylar 200 mektepte dáris alady.
Onyń ishinde 199 memlekettik, 11 jeke menshik, qazaq tilinde 138, orys tilinde 4, aralas 58 mektep pen 1 keshki-aýysymdyq bólimshe bar. Bilim ordalarynda 2015 jyly 109 392 oqýshy bilim alǵan. Al, 2022 jylǵy 1 qyrkúıekte oqýshylar sany 143 481-ge jetken.
Eske sala ketelik, buǵan deıin Atyraýda orta mekteptiń dırektorynan týberkýlez derti anyqtalǵanyn jazǵan edik.
Atyraý qalalyq bilim bóliminiń dereginshe, týberkýlez dertine shaldyqqan mektep dırektory densaýlyǵyna baılanysty jumysynan shettetilgen. Qazir ol arnaıy dıspanserde emdelip jatyr.
Keıin mektep muǵalimi men eki oqýshydan A gepatıti anyqtaldy.
Oblystyq sanıtarııalyq-epıdemıologııalyq baqylaý departamenti baspasóz qyzmetiniń aqparatyna qaraǵanda, bıylǵy qańtarda balalar arasynda A vırýsty gepatıttiń 2 jaǵdaıy tirkelgen.
Al, Atyraý qalalyq bilim bóliminiń málimetinshe, munaıly shahardaǵy orta mekteptiń muǵaliminen de A gepatıti anyqtalǵan.