Atyraý oblysynda 24 jastaǵy jigitti úsh kúnnen beri izdep jatyr

ATYRAÝ. QazAqparat – Atyraý oblysynda 24 jastaǵy jigit úsh kúnnen beri tabylmaı jatyr. Ol 20 qarashada tańda úıinen belgisiz baǵytqa shyǵyp ketip, sodan beri oralmaǵan, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, joǵalyp ketken jigit – Qyzylqoǵa aýdanynyń turǵyny.

«Qyzylqoǵa aýdanyndaǵy Jambyl aýyldyq okrýgine qarasty Qarakól aýylynda turatyn 24 jastaǵy jigit 20 qarashada tańǵy saǵat 05:00-de úıinen shyǵyp ketken. Sodan beri onyń qaıda júrgeni belgisiz. Ony izdestirý jumystary úshinshi kún qatarynan jalǵasyp jatyr. Іzdestirý jumystaryna Atyraý oblystyq tótenshe jaǵdaılar departamenti men Qyzylqoǵa aýdandyq polıtsııa bóliminiń, jergilikti atqarýshy organdardyń qyzmetkerleri men jergilikti turǵyndardan 37 adam 5 tehnıkamen tartyldy», -dep habarlady departamenttiń qoǵammen baılanys toby.

Ázirge joǵalǵan jigitti izdeý jumystary nátıje bergen joq.

Budan buryn Atyraý oblysynda joǵalǵan úsh adam bir kúnnen soń tabylǵanyn habarlaǵan bolatynbyz.

Onyń ekeýi 20 qarashada Atyraý qalasyna irgeles ornalasqan Qursaı aýylynan motorly qaıyqpen balyq aýlaý úshin Kaspıı teńizine qaraı shyqqan.

Al, 40 jastaǵy áıeldiń Qurmanǵazy aýdanyndaǵy Sasyqtaý ýchaskesinen mal izdeýge shyqqany anyqtalǵan.

Atyraý oblystyq tótenshe jaǵdaılar departamentiniń qyzmetkerleri úıine oralmaǵan eki er adam men bir áıeldi bir kúnnen soń tapqan.

Olardy izdeýge 10 adam men 4 tehnıka jumyldyryldy.