Atyraý oblysynda 2025 jylǵa deıin 35 medıtsına mekemesi ashylady
Atyraý oblysy ákiminiń orynbasary Jasulan Bısembıevtiń aıtýynsha, bıylǵy jyldyń sońyna deıin 10 medıtsınalyq nysan paıdalanýǵa beriledi.
«Qurmanǵazy aýdanyndaǵy Altynshy, Shaǵyrly, Jastalap, Eginqudyq aýyldarynda medıtsınalyq nysandy salýǵa daıyndyq bastaldy. Qazir arnaıy bólingen ýchaskelerde topyraq tógý jumystary júrip jatyr. Al, Mahambet aýdanynyń Taldykól aýylyndaǵy tozyǵy jetken dárigerlik ambýlatorııa ǵımaratyn buzý qolǵa alyndy. Ornyna zamanaýı ǵımarat salynady. Bıyl osy nysandarǵa qosa Isataı aýdanynyń ortalyǵy – Aqqystaý selosynda feldsherlik-akýsherlik pýnkt, Jylyoı aýdanynda ortalyq aýrýhana, Atyraý qalasynyń mańyndaǵy Bereke, Damby aýyldarynda dárigerlik ambýlatorııa qoldanysqa beriledi», -dep habarlady Jasulan Bısembıev.
Ákim orynbasarynyń deregine súıensek, kelesi jyly oblysta 25 densaýlyq saqtaý nysanynyń qurylysy salynady.
«Jańa nysandardyń arasynda 7 medıtsınalyq pýnkt, 6 dárigerlik ambýlatorııa, 5 feldsherlik-akýsherlik pýnkt bar. Atyraý qalasynda úsh qosalqy pýnkti bar jedel medıtsınalyq járdem stansasy úshin jańa ǵımarat boı kóteredi», -dep málim etti Jasulan Bısembıev.
Eske sala ketelik, budan burynAtyraý oblysynda 7 mektep pen 1 japsarjaı paıdalanýǵa beriletinin habarlaǵan edik.
Oblys ákiminiń orynbasary Jasulan Bısembıevtiń málimetinshe, jańa mekteptiń beseýi Atyraý qalasynda, bireýi Mahambet aýdanynda salynyp jatyr.
Al, Isataı aýdanynyń Tuşyqudyq aýylyndaǵy mektep janynan japsarjaı paıdalanýǵa beriledi. Jańa bilim ordalary 6 450 orynǵa eseptelgen.
Al, 2024 jyly 18 mektepti paıdalanýǵa berý josparlanǵan. Onyń ishinde 9 bilim ordasy «Jaıly mektep» baǵdarlamasymen salynady.