Atyraý oblysynda 1,1 mln teńgeden astam aıyppulyn tólemegen júrgizýshi ustaldy
Oblystyq polıtsııa departamentiniń baspasóz qyzmetinen málim etkendeı, aıyppulyn tólemegen júrgizýshi Atyraý – Aqtóbe baǵytyndaǵy jolda ustalǵan.
«Patrýldik polıtsııa basqarmasynyń qyzmetkerleri jergilikti ýaqytpen saǵat 16:30 shamasynda Kia markaly avtokólikti toqtatty. Júrgizýshiniń qujattaryn tekserý kezinde 1968 jylǵy turǵynnyń osy kezge deıin tólenbegen 52 aıyppuly bary anyqtaldy. Aıyppuldyń jalpy somasy 1 mln 152 myń teńgeni quraıdy. Sol sebepten, júrgizýshiniń kóligi QR Ákimshilik quqyq buzýshylyq týraly kodeksiniń 785-babyna sáıkes, Maqat aýdandyq ishki ister bóliminiń arnaıy turaǵyna jetkizildi», -dep habarlady departamenttiń baspasóz qyzmeti.
Júrgizýshi aıyppuldyń jınaqtalyp qalǵanynan habarsyz ekenin aıtqan. Ol shetelde tirkelgen kólikter týraly aqparaty «Sergek» kamerasy arqyly tirkeletinin bilmegenin jetkizgen.
«Turǵyndardyń deni zańdy tolyq bilmegendikten, quqyq buzady. Biraq, bul olardy jaýapkershilikten bosatpaıdy. Sol sebepten, turǵyndarǵa, ásirese, kólik júrgizýshilerine avtokólikti satyp alý kezinde qujattarynyń durystyǵyn tekserý qajettigin eskertemiz», -dep málim etti departamenttiń baspasóz qyzmeti.
Eske sala ketelik, buǵan deıin atyraýlyqtar kólikke 312,8 mln teńge salyq tólemegenin jazǵan bolatynbyz.
Atyraý qalalyq memlekettik kirister basqarmasy basshysynyń orynbasary Nurbolat Sarmanovtyń málimetine súıensek, jyl basynda júrgizýshilerdiń kólik salyǵyna qaryzy 200 mln 647 myń teńge bolǵan. Qazir kólik salyǵyn tólemegen 10 868 adamnyń bereshegi 312 mln 842 myń teńgege jetken.