Atyraý oblysynan Senat depýtattyǵyna 6 kandıdat usynylyp, 5-eýi tirkeldi
Atyraý oblystyq aýmaqtyq saılaý komıssııasynyń aqparatyna qaraǵanda, ózin-ózi usynǵandardyń arasynda 1 áıel, 5 er adam bar.
«Kandıdattardyń ortasha jasy – 51-de. Eń jasy – 42, úlkeni 59 jasta. Olardyń arasynda 2 zańger bar. Ózgeleri aýyl sharýashylyǵy, medıtsına, bilim jáne munaı-gaz ónerkásibi salasynyń mamandary. Úsh kandıdat memlekettik kásiporyndar men mekemelerde, 1-eýi kommertsııalyq qurylymda jumys isteıdi. Taǵy 1-eýi máslıhat apparatynyń qyzmetkeri bolsa, 1-eýi – jumyssyz», -dep habarlady oblystyq aýmaqtyq saılaý komıssııasynan.
Oblystyq aýmaqtyq saılaý komıssııasy kandıdattardyń Konstıtýtsııamen jáne Konstıtýtsııalyq zańmen qoıylatyn talaptarǵa sáıkestigin belgileý jóninde tıisti suraý salýlar joldaǵan. Sonyń nátıjesinde 5 kandıdattyń sáıkestigi rastalǵan. Al, 1 kandıdattyń sottalǵandyǵy belgilengen tártippen ótelmegen nemese alyp tastalmaýyna baılanysty qoıylatyn talaptarǵa sáıkes kelmegen.
«Atyraý oblystyq aýmaqtyq saılaý komıssııasy «Qazaqstan Respýblıkasyndaǵy saılaý týraly» Konstıtýtsııalyq Zańynyń 73-babyna sáıkes Parlament Senatynyń depýtattyǵyna 5 kandıdattyń tirkelgendigi jóninde habarlaıdy. Olar – Imanǵalıev Erbol Zınollauly, 1976 jyly týǵan, Atyraý oblystyq aýrýhanasynyń dırektory, Atyraý qalasynyń turǵyny; Qasymǵalıev Qanatbek Mahmýduly, 1979 jyly týǵan, «Embimunaıgaz» AQ bas dırektordyń óndiris jónindegi orynbasary, Atyraý qalasynyń turǵyny, Náýtıev Álibek Ibatollauly, 1963 jyly týǵan, Atyraý oblystyq máslıhatynyń hatshysy, Atyraý qalasynyń turǵyny, Sársemalıev Ǵılman Ámirjanuly, 1968 jyly týǵan, Jaıyq-Atyraý bekire balyq ósirý zaýytynyń dırektory, Atyraý qalasynyń turǵyny, Sherkeshbaeva Baǵyt Keńesqyzy, 1964 jyly týǵan, S.Muqashev atyndaǵy Atyraý polıtehnıkalyq joǵary kolledjiniń dırektory, Atyraý qalasynyń turǵyny», -dep málim etti oblystyq aýmaqtyq saılaý komıssııasynan.
Eske sala ketelik, buǵan deıin Senat depýtattyǵyna kandıdattardy usyný aıaqtalǵany habarlanǵan edi.