Atyraý oblysynan maqtaaraldyqtarǵa 160 tonnadan astam gýmanıtarlyq kómek keldi

MAQTAARAL. QazAqparat – Atyraý oblysynan sý tasqynynan zardap shekken maqtaaraldyqtarǵa gýmanıtarlyq kómek jetti. 160 tonnadan astam júk tıegen kerýen eki kún boıy jol júrip kelgen, dep habarlaıdy QazAqparat tilshisi.

Gýmanıtarlyq kómektiń ishinde azyq-túlik pen kıim-keshek, gıgıenalyq zattar bar. Bul zattardy jetkizý úshin 6 júk kóligi, 20 «Gazel» men 2 jeńil kólikten quralǵan kerýen sapar shekken.

«Eki táýlik shamasynda atyraýlyq aǵaıynnyń amanatyn Maqtaaralǵa jetkizdik. Sonymen qatar, Atyraý qalasy halqynan bólek, munaıly óńirge qarasty 7 aýdannyń jastary jınaǵan 15 mıllıon teńge Maqtaral aýdanynyń halqyna beriledi. Talaı qıyndyqty halqymyz birliktiń arqasynda jeńgen. Bul synaqty da birge ótkeremiz. Biz birgemiz!», - dedi kerýendi bastap kelgen azamattar.

Aıta keteıik, Atyraý oblysy ákimdiginiń qoldaýymen Maqtaaralǵa kómek kórsetý maqsatynda arnaıy qorǵa qarjy jınalǵan. Sonymen qatar, qajetti turmystyq zattar men kıim-keshekter, tósek-oryn jabdyqtary jasaqtalǵan. Kásipkerler men qarapaıym halyqqa deıin qolyndaǵy baryn kerýenge ákelip bergen bolatyn.