Atyraý oblysyna bir aptada shetelden 10 479 adam kelgen
Reseı Federatsııasynan kelip jatqan adamdar sanynyń artýyna baılanysty Atyraý oblysynyń ákimi Serik Shápkenovtiń tapsyrmasymen jedel shtab quryldy. Jedel shtabqa oblystyq jumyldyrý daıarlyǵy, azamattyq qorǵaý basqarmasynyń basshysy Esmuhan Qajkenov jetekshilik etedi.
Jedel shtab basshysynyń málimetinshe, 21-27 qyrkúıek aralyǵynda óńirge 10 479 sheteldik kelgen. Al 23 qyrkúıekten beri Halyqqa qyzmet kórsetý ortalyqtaryna Jeke sáıkestendirý nómirin (JSN) alý úshin Reseı Federatsııasynyń 2 754 azamaty júgingen.
«Qazaqstan aýmaǵyndaǵy qabyldaýshy tarap (Qazaqstan azamaty) sheteldik azamattyń el aýmaǵyna kelgenin úsh jumys kúni ishinde kóshi-qon qyzmetine habarlaýǵa tıis. Máselen, 21-27 qyrkúıek aralyǵynda Atyraý turǵyndary kóshi-qon polıtsııasyna Reseıden 644 azamattyń kelgeni týraly habarlady. Budan Reseı Federatsııasynyń kelgen azamattary úshin Atyraý qalasy negizgi turaqtap qalý aımaǵy emes ekeni baıqalady. Reseılikterdiń negizgi bóligi elimizdiń ózge óńirlerine barýdy josparlap otyr», - deıdi Esmuhan Qajkenov.
Onyń aıtýynsha, jedel shtab Atyraý qalasynda jalǵa beriletin turǵyn úı baǵasyna kún saıyn monıtorıng júrgizedi. Jekelegen shaǵyn aýdandarda ǵana baǵanyń ósýi baıqalady. Biraq, burynǵy baǵanyń 30-50 paıyzynan aspaıdy.
«Óńirde 109 Call-ortalyǵy jumys istep tur. Ortalyqtyń operator-keńesshileri Reseı Federatsııasynan kelgen azamattardyń suraqtaryna jaýap berip, qajetti aqparatty usynady», - dep málim etti Esmuhan Qajkenov.
Eske salaıyq, Atyraý oblysynda sheteldik 232 mamannyń jumys isteýine ruqsat berilmegenin budan buryn habarlaǵan edik.