Atyraý oblysyda úsh aıda 1 myńnan asa tonna balyq qyrylǵan

ATYRAÝ. QazAqparat – Atyraý oblysynyń sý aıdyndarynda úsh aıda 1 493 tonna balyq qyrylǵan, dep habarlaıdy QazAqparat.

Oblystyq balyq sharýashylyǵy basqarmasynyń baspasóz qyzmetinen málim etkendeı, sáýir-maýsym aralyǵynda Bezymıannyı men Almaǵambet kólinde balyqtyń qyrylǵany tirkelgen.

«Byltyr óńirdiń sý aıdyndarynda 12 tonna 408 kılo balyq ólgeni anyqtalyp edi. Al, bıyl Atyraý qalasy men aýdandarda balyqtardyń jappaı qyrylýynyń aldyn alý baǵytynda naqty jumystar atqaryldy. Sonyń nátıjesinde balyqtyń qyrylý deregi ótken jylǵy kórsetkishten 80 paıyzǵa deıin tómendedi. Bıyl Bezymıannyı kólinde 65 tonna, al, Almaǵambet kólinde 1 428 tonna óli balyq tirkeldi», -dep habarlady basqarmanyń baspasóz qyzmeti.

Bıylǵy 26 sáýirde Atyraý qalalyq ákimdigine qarasty Qaıyrshaqty aýyldyq okrýgindegi Bezymıannyı kólinde 65 tonna qarakóz balyǵynyń qyrylǵany anyqtaldy. Osyǵan oraı Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary qaırańǵa shyǵyp qalǵan balyqtardy qutqarý jumysyn júrgizdi.

Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, kóktemde balyqtar ýyldyryq shashý úshin qolaıly óriske shyqqan. Osyndaı sebeppen Bezymıannyı kólinde qyrylǵan balyq kanal aýzyna kelip tirelip qalǵan. Kólden qarakóz balyǵynyń 65 keli óli shabaǵy jınalǵan.

«Osyǵan baılanysty balyqtardyń ýyldyryq shashý ornyna erkin kirýi úshin Qaıyrshaqty okrýginiń aýmaǵynda 800 metr kanal qazyldy. Kanaldyń tereńdigi – shamamen 1 metr. Mamandar ólgen balyqty jınap aldy. Ólgen balyq sanıtarlyq talaptarǵa sáıkes kómý jolymen joıyldy. Tiri balyqtar súzilip, Jaıyq ózenine jiberildi», -deıdi Artýr Sádibekuly.

Onyń aıtýynsha, Mahambet aýdanyndaǵy Almaǵambet kólinde 10 jyldan beri sý bolmaǵan. Bıyl Jaıyq ózeninen atalǵan kólge sý shyqqan.

«On jyl boıy sýdyń kelmeýi bul kólde jyńǵyldyń ósýine sebep boldy. Bıyl kólge sý keldi. Kólge sýmen birge kelgen balyq jyńǵyldyń arasynda qalyp qoıyp, keri orala almaǵan. Otteginiń jetispeýshiliginen qyrylǵan», - dedi Artýr Sádibekuly.

Eske sala ketelik, buǵan deıin Atyraýda Bezymıannyı kólindegi ottegi mólsheri men sý tereńdigi tekserilgenin habarlaǵan bolatynbyz.