Atyraý oblysy: Úkimet basshysy stýdenttik jataqhanalardyń qurylys josparymen tanysty

ASTANA. QazAqparat - Búgin Atyraý oblysyna jumys sapary aıasynda QR Premer-Mınıstri Baqytjan Saǵyntaev D. Nurpeıisova atyndaǵy Atyraý mýzykalyq kolledjiniń bas ǵımaratyna baryp, salynyp jatqan stýdenttik jataqhananyń qurylysymen tanysty. Bul týraly primemiminister.kz  habarlaıdy.

Oblys ákiminiń orynbasary N. Saılaýovanyń aıtýynsha, óńirde alǵa qoıylǵan mindetter belsendi túrde iske asyrylyp jatyr. Baqytjan Saǵyntaevqa qurylys nysany - 100 orynǵa arnalǵan jataqhana tanystyryldy, ol bıyl shilde aıynda paıdalanýǵa beriledi.

Jalpy, Atyraý oblysynda 25 kolledj jáne 3 JOO bar. Bilim alýshylar sany - 29,6 myń adam, jataqhanalarǵa jalpy qajettilik kólemi -2300 oryn.

Aıta ketý kerek, kolledjderge 960 orynǵa arnalǵan 8 jataqhana salý boıynsha jobalar jobalaý satysynda tur. Qazirgi tańda 200 orynǵa arnalǵan eki jataqhana qurylysy bastaldy jáne taǵy 250 orynǵa arnalǵan eki jataqhana konkýrstyq rásimderdi qorytyndylaý satysynda tur. Qurylysty aıaqtaý merzimi 2019 jylǵa josparlanǵan.

Oblys JOO-laryna qajetti jataqhana orny - 850 oryndy quraıdy. 560 oryn boıynsha jobalyq-smetalyq qujattamany ázirleýdi aıaqtaý bıylǵy jyldyń ekinshi jartysyna, al 200 oryn boıynsha - 2019 jylǵa josparlanyp otyr. Memlekettik-jekeshelik áriptestik tetigi aıasynda búgingi qajettilikterdi qanaǵattandyrý boıynsha jumystar júrgizilýde.

Esterińizge sala keteıik, Prezıdenttiń bes áleýmettik bastamasynyń úshinshi baǵytynda stýdentterdiń bilim alý jáne jataqhanada turý jaǵdaılaryna erekshe nazar aýdarylǵan. 2022 jyldyń sońyna deıin kem degende 75 myń orynǵa arnalǵan stýdentterdiń jańa jataqhanalarynyń qurylysyn qamtamasyz etý qajet.

Bes áleýmettik bastamany iske asyrýdyń Jol kartasy aıasynda jataqhanalar qurylysy 2018 jyldyń qyrkúıek aıynda bastalady. 2022 jylǵa deıin elimizde jalpy 160-200 jataqhana salý josparlanyp otyr.

2019 jyldan bastap respýblıkalyq bıýdjette qurylys salýshylardyń ınvestıtsııalyq jáne paıdalaný shyǵyndaryn óteýge qarajat qarastyrylatyn bolady. Memleket tarapynan bir tósek ornyna 82 AEK túrinde (shamamen 197 myń teńge) qarajat bólinedi.

Sondaı-aq, Úkimet zańnamalyq ózgerister engizýdi usyndy: kelesi normatıvtik quqyqtyq aktilerge ózgerister men tolyqtyrýlar engiziletin zań jobasy ázirlendi: Bıýdjet kodeksi, Kásipkerlik kodeksi, «Bilim týraly», «Memlekettik múlik týraly», «Memlekettik satyp alýlar týraly», «Ońaltý jáne bankrottyq týraly» zańdar jáne t.b.