Atyraý oblysy sybaılas jemqorlyqtyń aldyn alý boıynsha sońǵy orynda tur
Bul týraly Atyraý oblysy ákimdigi janyndaǵy quqyq buzý profılaktıkasy jáne sybaılas jemqorlyqqa qarsy is-qımyl máseleleri jóninde vedomostvoaralyq komıssııanyń kezekten tys otyrysynda málim boldy.
Komıssııa otyrysyna quqyq qorǵaý organdary men oblystyq basqarma basshylary, Atyraý qalasy men 7 aýdannyń ákimderi selektorlyq rejımde qatysty.
Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Nurlan Jahınnyń aıtýynsha, agenttikte «Sybaılas jemqorlyqtyń aldyn alý jáne oǵan qarsy turýdyń» úlgilik bazalyq baǵyty bekitilgen.
«Atalǵan úlgilik bazalyq baǵytty óńirlerde júzege asyrýǵa baılanysty toqsandyq esep aıasynda baǵalaý júrgiziledi. Atyraý oblysyndaǵy jergilikti atqarýshy organdardyń atalǵan baǵytta atqarǵan jumysy kóńil kónshitpeıdi. Joba júzege asyrylyp jatqan 17 óńirdiń ishinde sońǵy orynda tur. Sybaılas jemqorlyq táýekelderin anyqtaý men joıý boıynsha 40 ball berildi», -deıdi Nurlan Jahın.
Osyǵan baılanysty oblys ákimi Serik Shápkenov sybaılas jemqorlyqqa qarsy is-qımyl jónindegi jumystarǵa nemquraılyq tanytpaýdy eskertti.
«Sybaılas jemqorlyq bar jerde ádiletti qoǵam ornata almaımyz. Memleket basshysy Qasym-Jomart Toqaev jańa ádiletti Qazaqstandy qurý úshin adam quqyǵy men zań ústemdigin saqtaý máselesin alǵa qoıdy. Osy tapsyrmany basty nazarǵa alyp, jumys istesek, sybaılas jemqorlyqtyń tamyryna balta shaýyp, jeńe alamyz», -dedi Serik Shápkenov.
Eske sala ketelik, budan buryn Atyraýda Antıkordyń usynysymen 46 laýazymdy tulǵa jaýapqa tartylǵanyn habarlaǵan bolatynbyz.