Atyraý oblysy sý aıdyndarynda shomylýǵa qaýipti 70 ýchaske bar
Oblystyq tótenshe jaǵdaılar departamentiniń qoǵammen baılanys tobynan málim etkendeı, sý aıdyndarynda 70 ýchaskede shomylýǵa tyıym salynǵan.
«Atyraý oblysynda shomylý maýsymy áli bastalǵan joq. Alaıda, arnaıy jadyqtalmaǵan jerde sý batyp ketý deregi tirkelip otyr. Sol sebepten sý aıdyndarynda shomylýǵa tyıym salynǵan 70 qaýipti ýchaske anyqtaldy. Onyń ishinde Atyraý qalasynda 17, Inder aýdanynda 10, Mahambette – 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar. Qaýipti ýchaskelerge 238 tyıym salý belgisi men 9 aqparattyq stend ornatyldy», -dep habarlady departamenttiń qoǵammen baılanys toby.
Tótenshelikter sýǵa ketý deregine baılanysty statıstıkalyq dáıekti usynyp otyr.
Birinshiden, sýdaǵy jazataıym oqıǵalardyń 95 paıyzy mas kúıinde shomylýdan bolady.
Ekinshiden, óz kúshin asyra baǵalaý da sýǵa batýǵa áser etedi. Úshinshiden, densaýlyqtyń kúrt nasharlaýy men qurysý ókinishke uryndyrady.
Ata-analar men eresekterdiń nemquraılyǵy balalardyń sýǵa batýyna ákelip soqtyrady.
«Atyraý oblysynyń turǵyndary men qonaqtarynan sýǵa túsý maýsymynyń resmı túrde ashylýyn kútýin ótinemiz. Sebebi, jaǵajaılardyń asty áli synǵan áınek, konserv qutysy, balyq aýlaý quraly sekildi qaýipti zattardan tazartylǵan joq. Sýǵa boılyq shekteý belgileri qoıylmady. Óıtkeni, Jaıyq ózeninde áli de aǵys bar. Arnaıy bekitilgen jaǵajaılarda qutqarýshylardyń kezekshiligi uıymdastyrylǵan kezde ǵana sýǵa túsýge bolady», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraý oblysynda 15 jasar jasóspirim kanal sýyna batyp ketkenin jazǵan edik.
Bir kúnnen keıin attan qulaǵan 12 jasar bala kanal sýyna batqanyn habarlaǵan bolatynbyz.
Sondaı-aq, Atyraý oblysynda sońǵy bir aptada 4 adam sýǵa ketkeni tirkelgen.