Atyraý oblysy munaı men gazdy tereń óńdeıtin ortalyqqa aınalýǵa tıis - Toqaev
Kezdesýdiń basynda Prezıdent Atyraý óńirinen shyqqan tarıhı tulǵalarǵa toqtalyp ketti.
«Atyraý alqaby – tabıǵı baılyǵymen qatar tarıhı muralarymen de tanymal ólke. Óńirde myńdaǵan jyl boıy ozyq órkenıetter bolǵan. Bul jerden tabylǵan«Altyn adam» – sonyń bir aıǵaǵy. Kóneniń kózindeı Saraıshyqta ataqty handarymyz ordasyn tikken. Shahar kezinde eń iri jáne eń damyǵan qalalardyń biri bolǵany barshaǵa málim.
Imanqara úńgiri, Aqmeshit qorymy jáne basqa da tarıhı oryndar qazaqtyń san qıly shejiresinen habar beredi. Osy aımaqtan Isataı men Mahambetteı batyrlar, Murat pen Shernııazdaı aqyndar shyqqan. Bul ólke qazaq rýhanııatynda orny bar aqyn-jazýshylarymen, zııaly azamattarymen tanymal. Ánuranymyzdyń avtory Jumeken Nájimedenov – osy óńirdiń týmasy. Sonymen qatar, Ábý Sársenbaev, Hamıt Erǵalıev, Zeınolla Qabdolov, Farıza Ońǵarsynova, Qarshyǵa Ahmedııarov, Raqymjan Otarbaev jáne basqa da birtýar tulǵalardy atap ótýge bolady.
Búgin aramyzda Qazaqstannyń Eńbek Eri Ilıa Jaqanov aǵamyz bar. Bárimiz bul asa kórnekti kompozıtor, jazýshy, ónertanýshy tulǵany maqtan tutamyz. Qaımaǵy buzylmaǵan qazaqtyń baıyrǵy mekeni qaı jaǵynan alyp qarasaq ta, qarqyndy damyp kele jatyr. Biz memlekettik saıasatta«Qýatty óńirler – qýatty el» qaǵıdatyn ustanamyz», dedi Qazaqstan Prezıdenti.
Memleket basshysy aımaqtyń ekonomıkasyn ártaraptandyrý qajet ekenin aıtty.
«Aımaqtyń ekonomıkasyn ártaraptandyrý qajet. Atyraý oblysy munaı men gazdy tereń óńdeıtin ortalyqqa aınalýǵa tıis. Polıpropılen óndiretin keshenniń iske qosylýy – osy baǵyttaǵy mańyzdy qadam. Aımaqta munaı-hımııa klasterin qurýdyń birinshi kezeńi osylaı júzege asyrylyp jatyr. Qazaqstan kómirsýtegi shıkizatynyń qory eń kóp jıyrma memlekettiń qataryna kiredi. Soǵan qaramastan, elimiz munaı-hımııa ónimderiniń 95 paıyzyna jýyǵyn ımporttap otyr. Bul – durys emes. Biz ishki suranysty tolyq qamtamasyz ete alamyz. Tipti, syrtqy naryqtarǵa shyǵýǵa múmkindik bar. Munaı-hımııa kásiporyndary ınvestıtsııa salýǵa óte qolaıly. Álemde olardyń ónimine suranys joǵary jáne bul suranys arta beredi. Sondyqtan, osy oblysta«Ulttyq ındýstrııalyq munaı-hımııa tehnoparki» arnaıy ekonomıkalyq aımaǵy quryldy. Onda jumys isteıtin kompanııalarǵa salyq jáne keden jeńildikteri beriledi», - dedi Qasym-Jomart Toqaev.