Atyraý oblysy 5 aıda Ulttyq qorǵa 1,6 trln teńge aýdardy

ASTANA. QazAqparat – Atyraý oblysy 5 aıda Ulttyq qorǵa 1,6 trln teńge aýdardy. Bul týraly Atyraý oblysynyń ákimi Serik Shápkenov aıtty, dep habarlaıdy QazAqparat tilshisi.

«2022 jyly jalpy óńirlik ónim 14,1 trln teńgeni, naqty kólem ındeksi 101,6 paıyzdy qurady. Respýblıkanyń jalpy ishki ónimindegi oblys ekonomıkasynyń úlesi 13,7 paıyzdy qurap otyr. Al jan basyna shaqqandaǵy jalpy óńirlik ónim – 20,5 mln teńge. Jyl basynan beri salyqtyq jáne basqa da mindetti túsimder 2,6 trln teńgeni qurady. Onyń ishinde memlekettik bıýdjetke 1,0 trln teńge kóleminde, Ulttyq qorǵa 1,6 trln teńge aýdaryldy», - dedi S.Shápkenov Ortalyq kommýnkatsııalar qyzmetindegi baspasóz máslıhatynda.

Onyń dereginshe, 2023 jyldyń qańtar-mamyr aılarynda óńirdegi ónerkásip óniminiń kólemi ótken jyldyń osy kezeńimen salystyrǵanda 5,8 paıyzǵa ósip, 4,6 trln teńgeni qurap otyr.

«Atyraý óńirinde munaı-gaz salasy damyǵan. Búginde 22,4 mln tonna munaı, 11,5 mlrd tekshe metr ilespe munaı gazy óndirildi. Jalpy respýblıkamyzdyń barlyq ónerkásibiniń 24,5 paıyzy – Atyraý oblysyna tıesili», - dedi óńir basshysy.