Atyraý oblystyq PD burynǵy bastyǵynyń áskerı ataǵy ózinde qalady - ІІM

NUR-SULTAN. QazAqparat - Atqa minip, ataq alǵanyn atap ótken Atyraý oblystyq Polıtsııa departamentiniń burynǵy bastyǵy Aıan Dúısenbaev quqyq qorǵaý organy salasynda eńbek ete ala ma? Bul suraqqa Іshki ister mınıstriniń orynbasary Alekseı Kalaıchıdı jaýap berdi, dep habarlaıdy QazAqparat tilshisi.

«Ol qyzmetinen bosatyldy. Biraq, jumystan shyǵarylǵan joq. Jazalaýdyń birneshe túri bar. Ol jazalardyń biri - bastyq qyzmetinen bosatylǵanymen, tómendetilgen tártipte jumysta bola alady. Ekinshiden, áskerı ataǵy boıynsha tómendetý de bar. Zań boıynsha, eger belgili bir áskerı bastyqty áskerı ataǵynan aıyrar bolsa - ol jaza bar-joǵy alty aı kúshinde bolady. ıAǵnı, alty aıdan keıin ataǵy oǵan qaıtarylar edi. Alaıda biz qatańdaý - qyzmetinen bosatý jazasyn berdik. Ol budan ári rezervte bolmaıdy. ІІM-niń qaraýynda bolady. Qyzmetinen bosatylǵan kez kelgen ofıtser burynǵydan tómengi laýazymǵa taǵaıyndalǵanǵa deıin ІІM-niń qaraýynda júredi», - deıdi Alekseı Kalaıchıdı OKQ-da ótken baspasóz máslıhatynan keıin tilshilerge.

Onyń aıtýynsha, áskerı ataq ofıtserden tek qylmys jasaǵan kezde nemese jemqorlyq qylmysyna barǵan jaǵdaıda tartyp alynady.

Alekseı Kalaıchıdı budan buryn Polıtsııa departamentiniń burynǵy bastyǵy polıtsııa general-maıory shenin alýyna oraı uıymdastyrylǵan sharaǵa qatysqanyn málim etken edi.

Eske sala ketsek, QR Іshki ister mınıstrligi osy oqıǵa boıynsha budan buryn túsinikteme bergen edi. Al, QR Prezıdenti Qasym-Jomart Toqaev Atyraý oblystyq PD bastyǵynyń áreketin tekserýdi tapsyrǵan bolatyn.