Atyraý oblystyq máslıhatyna AMANAT partııasynan 10 depýtat ótti
Búgin AMANAT partııasy Atyraý oblystyq fılıalynyń saıası keńesinde partııalyq tizim boıynsha mandatty bólý týraly másele qaraldy.
«2023 jylǵy 19 naýryzda ótken saılaý qorytyndysymen Atyraý oblysy saılaýshylarynyń 59,94 paıyzy AMANAT partııasyna daýys berdi. Soǵan sáıkes Atyraý oblystyq máslıhatynyń depýtattyǵyna 10 mandat bólindi. Oblystyq máslıhatqa partııalyq tizimmen bekitilgen 10 depýtattyń 50 paıyzy – áıelder. Al, 35 jasqa deıingi jastardyń úlesi 20 paıyzdy quraıdy», -dep habarlady partııanyń óńirlik fılıalynan.
Oblystyq málıhattyń depýtaty bolyp AMANAT partııasynyń 10 múshesi saılandy.
Olar – Jeńis Ábilqares, Jańaı Amantýrlın, Aıgúl Ámirǵalıeva, Aıbar Erekeshov, Abdolla Idresov, Gúlnaz Qosmurzıeva, Elmıra Saparova, Fatıma Tóleeva, Nadejda Týlına men Jasulan Haırýllın.
Eske sala ketelik, budan buryn Atyraý oblysy máslıhatynyń bir mandatty okrýginen 15 depýtat saılanǵanyn jazǵan bolatynbyz.
Atyraý oblystyq aýmaqtyq saılaý komıssııasynyń málimetinshe, saılaýshylar tizimine 412 382 adam engizilgen.
Saılaýda daýys berýge 204 097 saılaýshy qatysty. Oblystyq máslıhattyń bir mandatty aýmaqtyq saılaý okrýgteri boıynsha kandıdattardyń jalpy sany – 39.
«Daýys berýge qatysqandar sanynan saılaýshylardyń 5 jáne odan da kóp paıyzyn alǵan saıası partııalar úshin depýtattyq mandattar mynadaı etip bólindi. «Amanat» partııasyna 10, «Aýyl» halyqtyq-demokratııalyq patrıottyq partııasyna 1, «Respublica» partııasyna 1, «Baıtaq» jasyldar partııasyna 1, «Aq jol» demokratııalyq partııasyna 2 oryn berildi», - dep habarlaǵan edi oblystyq aýmaqtyq saılaý komıssııasynan.