Atyraý oblystyq ákimdiginiń búlingen ǵımaraty qalpyna keltirildi
Oblystyq qarjy basqarmasynyń basshysy Azamat Sálimbaevtyń aıtýynsha, tártipsizdik kezinde ákimdik ǵımaratyna keltirilgen shyǵyn kólemi 6 mıllıon teńgeni quraǵan.
«Ǵımarattyń synǵan 11 terezesin qalpyna keltirýge 2,5 mıllıon teńge jumsaldy. Oblystyq ákimdik ǵımaratynan birneshe noýtbýk, kireberiste turǵan Memlekettik tý urlanǵan. Kabelder búlingen. Kabınetterdiń esikteri zaqymdanǵan. Keltirilgen zııannyń bir bóligi qolda bar qorlar esebinen óteldi», - deıdi Azamat Sálimbaev.
Sondaı-aq «Isataı-Mahambet» ortalyq alańy búlingen. Alańǵa keltirilgen shyǵyn 3 mıllıon teńgege baǵalanǵan. Qazir alańda qalpyna keltirý jumystary aıaqtalýǵa taıaldy.
Eske salaıyq, budan buryn Atyraýda ákimdik ǵımaraty búlinip, 170-ke jýyq adam ustalǵanyn jazǵan bolatynbyz.