Atyraý: «Nur Otan-nyń» fılıaly Jaıyqtaǵy balyq qyrylý jaǵdaıyn baqylaýda ustaıdy
«Nur Otan» partııasy oblystyq fılıaly tóraǵasynyń birinshi orynbasary Nurlybek Ojaev jáne vedomstvoaralyq komıssııanyń tóraǵasy, oblys ákiminiń orynbasary Álibek Náýtıev ótken jyldyń jeltoqsan aıynda Jaıyq ózeninde balyqtyń qyrylý sebebin anyqtaýǵa jumyldyrylǵan memlekettik organdar basshylarynyń esepterin tyńdady.
N.Ojaev atap ótkendeı, búginde atalǵan problema turǵyndardy alańdatýda. Aýa raıynyń jylynýyna baılanysty ózen jaǵalaýynda balyq ólekseleri jınalyp qalǵan. Kóptegen turǵyndar partııanyń qoǵamdyq qabyldaýyna kelip, múddeli organdardyń osy máseleni sheshý boıynsha atqaryp jatqan naqty sharalary jóninde halyqty aqparattandyryp otyrýdy suraǵan.
Búgingi tańda partııa halyqtyń múddesin qorǵaıtyn jáne Elbasy tapsyrmalarynyń oryndalýyn baqylaıtyn basty ınstıtýtqa aınaldy. «Halyqqa kómek» jańa partııalyq jobasy iske asa bastady. Bul joba tikeleı Elbasynyń tapsyrmasy boıynsha qolǵa alynǵan. Turǵyndardyń, jurtshylyqtyń problemalaryna jedel áreket etý qajettigin Memleket basshysy partııanyń XVIII sezinde de atap ótti.
Osy jumystar aıasynda júıeli sheshýdi, jan-jaqty zerdeleýdi qajet etetin qoǵam nazaryna ilingen, problemalyq, qıyn máselelerge proaktıvti monıtorıng júrgiziledi.
"Qazir aımaq halqyn alańdatyp otyrǵan problema - Jaıyq ózeniniń jaǵdaıy, balyqtardyń qyrylýy. Partııa músheleri Jaıyq jaǵalaýyn qoqystan tazartýǵa arnalǵan jalpyqalalyq senbilikke qatysty. Bir kúnniń ishinde 52 tonna qoqys, 4,3 tonna óli balyq jınaldy",-dedi Nurlybek Ojaev.
Partııa alańynda ótken vedomstvoaralyq jumys tobynyń otyrysynda sóılegender ózen sýynyń sapasyn, balyq pen balyq ónimderiniń bazarlarda, saýda núktelerinde satylýyn baqylaý, balyq ólekselerin jınaý, jaǵalaýdy turmystyq qaldyqtardan tazartý boıynsha atqarylyp jatqan sharalar týraly aıtty.
Kezdesý barysynda ózende balyq qyrylýynyń sebepterin anyqtaý jaıy «Nur Otan» partııasynyń nazarynda ekeni jáne kún saıynǵy monıtorıng qortyndysy partııanyń oblystyq fılıalyna jiberiletini aıtyldy.
«Ekologııa departamentiniń, qoǵamdyq densaýlyq saqtaý departamentiniń, polıtsııa, densaýlyq saqtaý basqarmasy, veterınarlyq qyzmet basshylary júrgizilip jatqan jumystar boıynsha tolyq aqparat berdi. Bazarlarda, saýda oryndarynda balyq ónimderin satý núktelerine baqylaýdy kúsheıtý týraly tapsyrma berdik. Qazir jaǵdaı turaqty. Kún saıynǵy monıtorıng ózen sýynda normadan aýytqý joq ekenin kórsetip otyr. Satýǵa shyǵarylǵan jáne jańa aýlanǵan balyqtarǵa zerthanalyq synamalar buzýshylyqtardy anyqtamady. Medıtsınalyq mekemelerge balyq ónimderinen ýlaný, ınfektsııalyq aýrý deregimen túskender tirkelgen joq», - dep atap ótti Nurlybek Ojaev.
Veterınarlyq qyzmet balyq ónimderin satatyn 41 saýda núktesin baqylaýda ustap otyr. Balyq aýlaý ornynan satý núktesine deıingi jáne tutynýshyǵa jetkenge deıingi aralyqtyń bárine monıtorıng júrgiziledi. Satý oryndarynyń bárine oblystyq partııalyq baqylaý komıssııasynyń músheleri tekserý júrgizetin bolady.
Quqyq qorǵaý organdaryna tekserýdi ashyq júrgizip, qortyndysy týraly naqty aqparatty usyný tapsyryldy. Ákimdik balyq satylýy múmkin jerlerdiń bárine qatań baqylaý jasaıdy.
Vedomstvoaralyq jumys tobynyń keńeıtilgen otyrysynda Atyraý oblystyq ákimdiginiń jáne «Nur Otan» partııasy oblystyq fılıalynyń bastamasymen bıyl jazda Jaıyq ózenine ǵylymı zertteý jumysy júrgiziletini aıtyldy.
Oblystyq máslıhat depýtattarynyń sheshimi boıynsha osy maqsatqa jergilikti bıýdjetten 80 mln teńge bólindi. Tender jarııalanyp, oǵan otandyq, sheteldik ǵylymı-zertteý toptary qatysa alady. Zertteý jazdyń úsh aıynda júrgiziledi dep josparlanýda. Sodan keıin ekologııalyq ahýal, lastaný sebepteri men sý sapasy týraly problemalyq máseleler boıynsha mamandar naqty usynymdar beredi. Ózen jaǵdaıy Mahambet aýdanynan bastap Kaspıı teńizine quıylatyn jerge deıin zertteledi.
Oblystyq vedomstvoaralyq komıssııanyń keńeıtilgen otyrysynda aıtylǵan barlyq tapsyrmalar partııanyń baqylaýyna alynady. Ár baǵyt boıynsha júrgizilgen jumystar týraly jurtshylyqqa jedel aqparat beriledi.