Atyraý munaı óńdeý zaýytynyń murjasynan qara tútin býdaqtap jatyr
Áleýmettik jelilerde zaýyt aýmaǵynan qara tútinniń býdaqtaǵany beınelengen foto men vıdeo júkteldi. Zaýyttyń qoǵammen baılanys tobynyń málimetinshe, elektr jelisindegi aqaýdyń saldarynan qondyrǵylardyń jumysy apattyq jaǵdaıda toqtatylǵan.
Mundaı jaıt birinshi ret bolyp otyrǵan joq. Máselen, bıylǵy sáýirde Atyraý munaı zaýytynyń murjasynda jarty saǵatqa jýyq ot alaýlaǵanyn jazǵan bolatynbyz. «AMÓZ» JShS qoǵammen baılanys bóliminiń aqparatyna boıynsha, 27 sáýirde jergilikti ýaqytpen saǵat 16:08-de katalıtıkalyq krekıng qondyrǵysynda tehnologııalyq rejım buzylǵan.
«Avarııalyq jaǵdaılarǵa jol bermeý maqsatynda janarmaı gazy májbúrli túrde fakelge jiberildi. Saǵat 16:33-te gazdy fakelge jiberý toqtatyldy. Qazir tehnologııalyq rejımniń buzylýynyń sebep-saldary anyqtalyp jatyr», - dep habarlaǵan edi zaýyttyń qoǵammen baılanys bóliminen.
Keıin Atyraý munaı óńdeý zaýytynyń murjasynda taǵy da gaz alaýy janǵanyn habarlaǵan edik. 8 mamyrda paraksılol óndiretin Paramax (PX) tehnologııalyq qondyrǵysyn iske qosý sharasy júrgizilgen. Alaıda, saǵat 19:18-de aldyn ala fraktsııaǵa bólý baǵanyn ystyq tsırkýlıatsııaǵa shyǵarý kezinde qysym klapanynyń jumysynan aqaý shyqqan.
«Sol sebepten, tehnologııalyq kontýrda qysym joǵarylady. Apattardy joıý josparyna sáıkes jabdyqtyń germetıkalyq qasıetiniń buzylýyn boldyrmaý maqsatynda jaǵdaı turaqtalǵanǵa deıin gaz ýaqytsha fakelge jiberildi», - dep habarlady kásiporynnyń qoǵammen baılanys bóliminen.