Atyraý munaı óńdeý zaýytynyń qondyrǵylary iske qosylyp jatyr

ATYRAÝ. QazAqparat – Atyraý munaı óńdeý zaýytynda elektr energııasyn berý qalpyna keltirildi. Qazir tehnologııalyq qondyrǵylardy kezeń-kezeńimen iske qosý bastaldy, dep habarlaıdy QazAqparat tilshisi Energetıka mınıstrliginiń baspasóz qyzmetine silteme jasap.

«Tehnologııalyq reglamentter men arnaıy nusqaýlyqtarǵa sáıkes paıdalaný personaly jalpy zaýyttyq sharýashylyq nysandaryn kezeń-kezeńimen iske qosýdy jáne energııa resýrstaryn berýdi bastady. Onyń ishinde jabdyqtar men qubyrlar júıelerin úrleıtin azot kompressorlaryn, gradıen salqyndatqysh sý nasostaryn, baqylaý-ólsheý aspaptary jáne avtomatıkaǵa arnalǵan aýany tekserý jelisi bar. Avtomattandyrylǵan basqarý júıelerin tekserý jáne baptaý jalǵasyp jatyr», - dep habarlady vedomstvodan.

Munaıdy tereń óńdeý jáne hosh ıisti zattardy óndirý kesheniniń nysandaryn iske qosý negizgi jáne qosalqy jabdyqtardy tekserilgen soń júrgiziledi.

Eske sala ketelik, budan buryn elektr qýatynyń joqtyǵynan Atyraý munaı óńdeý zaýyty jumysyn toqtatqanyn habarlaǵan edik.

Zaýyttyń qoǵammen baılanys bóliminiń málimetinshe, elektr jelisindegi aqaýdyń saldarynan qondyrǵylardyń jumysy apattyq jaǵdaıda toqtatylǵan.

«Atyraý munaı óńdeý zaýyty 3 shilde kúni jergilikti ýaqytpen saǵat 17:25-te jumysyn toqtatty. Buǵan «KEGOC» AQ tarapynan elektr energııasynyń óshirilýi sebep boldy. Tehnologııalyq reglamentke sáıkes apatty jaǵdaıdyń aldyn alý maqsatynda elektr energııasynyń syrtqy jelilerin tolyq qalpyna keltirgenge deıin zaýyttyń otyn jelisi fakelge jiberildi», - dep málim etti zaýyttyń qoǵammen baılanys bóliminen.

Keıin Energetıka mınıstrligi elimizde janar-jaǵarmaıdyń jetkilikti qory baryn aıtqanyn jazǵan bolatynbyz.

Sondaı-aq, elimizdiń munaı óńdeý zaýyttarynda otyn jóneltý jalǵasyp jatqanyn aıtylǵan edi.