Atyraý munaı óńdeý zaýytynyń burynǵy bas dırektoryn aqtaý úkimi ózgerissiz qaldy
Atyraý oblystyq sotynyń qylmystyq ister jónindegi sot alqasy Atyraý qalasynyń №2 sotynyń Atyraý munaı óńdeý zaýytynyń («AMÓZ» JShS) burynǵy bas dırektory D. jáne satyp alý departamentiniń dırektory S.-ǵa qatysty úkimin apellıatsııalyq tártipte qaıta qarady.
D. jáne S.-ǵa QR Qylmystyq kodeksininiń 361-babynyń 4-bóligi 3-tarmaǵymen aıyp taǵylǵan.
«Atyraý qalasynyń №2 sotynyń úkimimen D. jáne S. taǵylǵan qylmystyq quqyq buzýshylyq quramynyń bolmaýyna baılanysty barlyq epızod boıynsha kinásiz dep tanyldy.
Sot sottalýshylardyń qylmystyq is júrgizýshi organnyń zańsyz áreketterinen keltirilgen zańsyz qylmystyq qýdalaý úshin zııandy óndirý quqyǵyn tanydy.
Azamattyq talap qaraýsyz qaldyryldy. Іs apellıatsııalyq satyda prokýrordyń sottyń aqtaý úkiminiń kúshin joıyp, D. jáne S.-ǵa qatysty aıyptaý úkimin shyǵarýdy suraǵan apellıatsııalyq ótinishhaty boıynsha qaraldy. Apellıatsııalyq sotpen sot úkimin ózgertýge nemese onyń kúshin joıýǵa negizder anyqtalmady. Sondyqtan, qylmystyq ister jónindegi sot alqasynyń qaýlysymen birinshi satydaǵy sot úkimi ózgerissiz, apellıatsııalyq ótinishhat qanaǵattandyrýsyz qaldyryldy», - dep habarlady Atyraý oblystyq sotynyń baspasóz qyzmeti.
Budan buryn Atyraý munaı óńdeý zaýytynyń burynǵy bas dırektory aqtalyp shyqqanyn habarlaǵan edik.