Atyraý munaı óńdeý zaýytyndaǵy aqaýǵa jol bergender jazalanady
5 qarashada «QazMunaıGaz» UK AQ basqarma tóraǵasynyń munaı óńdeý jáne munaı hımııasy jónindegi orynbasary Danııar Tıesovtiń Atyraý munaı óńdeý zaýytyna arnaıy sapary barysynda jınalys ótti.
«Jınalysta bıologııalyq tazartý qurylǵysynda oryn alǵan oqıǵa qarastyryldy. Atap aıtqanda, qazirgi kezde munaı ónimderiniń bekitilgen normadan shekti ruqsat etilgen shyǵaryndylarynyń joǵary mólsheri anyqtalmaǵany jóninde esep berildi. Budan bólek, oqıǵa sebepteri men júrgizilgen tekserýdiń nátıjeleri eskerilip, tabıǵatty qorǵaý boıynsha is-sharalar jospary qaıta pysyqtaldy», delingen habarlamada.
Oqıǵany tergeý jónindegi komıssııanyń tekserý nátıjeleri boıynsha AMÓZ-diń jaýapty tulǵalaryn jazaǵa tartý týraly sheshim qabyldanady.
«Qala úshin kúrdeli oqıǵa oryn aldy. Oǵan zaýyt jaýapty. Qala turǵyndarynan keshirim suraımyz. QMG basshylyǵy jaǵdaıdy jiti baqylaýynda ustap otyr. Biz zaýytta aýqymdy jańǵyrtý jumystaryn júrgizdik, biraq, ókinishke qaraı, qyzmetkerlerimizdiń sana-sezimi, sonyń ishinde óndiristik tsıklder úshin jeke jaýapkershiligi jaǵy áli de jańǵyrý ústinde. Bul qyzmetkerler de osy qalanyń turǵyndary, olardyń jumysynyń nátıjesi búkil Atyraý halqynyń aman-saýlyǵyna tikeleı áser etedi. Zaýyt asa qysqa merzim ishinde jaǵdaıdy túzetip, aldaǵy ýaqytta osyndaı apattardy boldyrmaý boıynsha tıisti sharalar qabyldaýǵa tıis», – dep atap aıtty D.Tıesov.
Eske sala keteıik, 1 qarashada saǵat 16.00-de elektr qýatyn berýdegi aqaýy saldarynan sarqyn sýdy bıologııalyq tazartý blogy tundyrǵyshynyń shlamdy retsırkýlıatsııalaý sorǵysy toqtap qalǵan. Soǵan baılanysty tundyrǵyshtyń qum súzgisine shyǵýy ornynda qalqyma jáne organıkalyq zattar (bıoshlam) shyǵaryndylary shamadan asty. Bul kezde qum súzgisi blogynda jóndeý jumystary júrip, atalǵan blok tehnologııalyq shemadan ýaqytsha ajyratylǵan edi. Sonyń saldarynan bıologııalyq tazartý qurylystarynan quramynda qalqyma jáne organıkalyq zattary bar sarqyndy sý normatıvti tazartylǵan sarqyndy sý arnasyna aǵyp ketti. 1 qarashada saǵat 23:00-de bıologııalyq tazartý qurylystarynyń jumysy qalpyna keltirildi. Sonymen qatar, normatıvti-tazartylǵan sarqyndy sý arnasynda bıoshlamnyń býlaný óristerine odan ári ótýine jol bermeıtin bógetter ornatyldy. Qazirgi ýaqytta arnadaǵy bıoshlam vakýýmdyq mashınalarmen sorylyp, zaýytqa qaıta ákelinip jatyr.