Atyraý munaı óńdeý zaýytyna 5 mln teńge aıyppul salyndy

ATYRAÝ. QazAqparat – Atyraý munaı óńdeý zaýytyna 5 mln teńge aıyppul salyndy. Bul týraly oblystyq ekologııa departamenti basshysynyń orynbasary, bas memlekettik ınspektor Syrym Tlegenov málim etti, dep habarlaıdy QazAqparat.

Onyń aıtýynsha, ekologııa departamentiniń mamandary «Atyraý munaı óńdeý zaýyty», «ALMEKS plıýs», «Svetland-oıl» jaýapkershiligi shekteýli seriktestikteri sekildi iri kásiporyndarǵa profılaktıkalyq baqylaý júrgizgen.

«Profılaktıkalyq baqylaý nátıjesimen «AMÓZ» JShS-ǵa qatysty birqatar buzýshylyq anyqtaldy. Atap aıtqanda, sarqyndy sýlardyń tógindileri týraly málimetter durys toltyrylmaǵan. Qaldyqtardyń kólemi týraly kesteni zerdeleý kezinde derekter tolyq usynylmaǵan. Qondyrǵylardyń aýmaǵynda paıdalanylǵan hımııalyq reagentterdiń jáne paıdalanylǵan maılardyń bóshkeleri, metall synyqtary, paıdalanylǵan maılanǵan rezeńke buıymdary, dánekerleý elektrodtarynyń tuqyldary anyqtaldy. Beton synyqtary túrindegi qurylys qaldyqtardy jınaýǵa arnalǵan arnaıy jabdyqtalǵan oryndar joq ekeni belgili boldy», - dedi Syrym Tilegenov.

Onyń dereginshe, tekserý kezinde mehanıkalyq tazalaý qondyrǵysynyń aýmaǵynda quramynda munaıy bar aǵyndar ornalastyrylǵan. Al býlaný kezinde qalanyń atmosferalyq aýasyna teris áser etetin lastaýshy zattar bólinetin ashyq túrdegi №3 qosymsha tunba ydystary men toǵany bar ekeni anyqtalǵan.

«Kúkirt óndirý qondyrǵysynyń peshterinde, kúkirt óndirýdiń aralas jáne tereń óńdeý kesheniniń katalıtıkalyq krekıng qondyrǵysynda synama alatyn qurylǵy bolmaǵan. Osylaısha, 2021-2023 jyldarǵa arnalǵan «AMÓZ» JShS qorshaǵan ortany qorǵaý jónindegi is-sharalar josparynyń 1.5 tarmaǵyn oryndamaǵan. Qorshaǵan ortaǵa emıssııalarǵa ruqsatta kórsetilgen sharttardy tolyq kólemde oryndamaı otyr. Bıylǵy jyldyń mamyr-maýsym aılarynda «AMÓZ» JShS-niń 2022 jyldyq jospar-kestesinde kórsetilmegen qondyrǵylardyń jospardan tys turyp qalý áserinen qorshaǵan ortaǵa ekologııalyq ruqsatsyz emıssııalardy júzege asyrǵany anyqtaldy», -dep málim etti Syrym Tilegenov.

Osyndaı buzýshylyqtardyń nátıjesimen Atyraý munaı óńdeý zaýytyna QR Ákimshilik quqyqbuzýshylyq týraly kodeksiniń 324, 325, 326, 327, 328, 337, 344-baptarymen jalpy somasy 5 mln teńgeden astam aıyppul salynǵan.

Sondaı-aq «ALMEKS plıýs» JShS-niń aýmaǵynda polıetılen qabyqshalary, aǵash qaldyqtary, plastıkalyq shelekter, biteýishter sııaqty qaldyqtar shashylyp jatqany anyqtalǵan. Atalǵan seriktestikke 150 myń teńgeden astam aıyppul salynyp otyr.

Eske sala ketelik, budan buryn Atyraý oblysynda tabıǵatty búldirgenderge 189 mln teńge aıyppul salynǵanyn jazǵan edik.

Foto: m.azh.kz