Atyraý munaı óńdeý zaýytyn jańǵyrtý jumystary bıyl aıaqtalady - M.Myrzaǵalıev

ASTANA. QazAqparat - Atyraý munaı óńdeý zaýytyn jańǵyrtý jumystary bıyl aıaqtalady. Bul týraly búgin elordada ótip jatqan Ortalyq Azııadaǵy munaıdy qaıta óńdeý jáne munaı hımııasy atty úshinshi jylsaıynǵy konferentsııa barysynda QR Energetıka vıtse-mınıstr Maǵzum Myrzaǵalıev málim etti.

«Sońǵy jyldary álemdik munaı-gaz salasy munaı baǵasynyń quldyraýy men ekonomıkalardyń turaqsyzdyǵy aıasynda túbegeıli ózgeristerge ushyraýda. Qazaqstan ekonomıkasynyń aldynda ózgeriske ushyraǵan syrtqy jaǵdaılarǵa beıimdelý syndy kúrdeli mindetter tur», - dep atap ótti.

Sonymen qatar ol  munaı óńdeý qýattaryn jańǵyrtý, munaı-gaz kesheniniń básekege qabiletti keshenderin salý elimizdiń munaı-gaz ónerkásibi salasyn damytýdyń basymdyqty baǵyttary ekendigin basa aıtty.

«Qazirgi ýaqytta bizdiń úsh munaı óńdeý zaýytymyzdy rekonstrýktsııalaý jáne jańǵyrtý jumystarynyń júrgizilip jatqanyn aıtqym keledi. Birinshi bolyp jańǵyrtý jumystaryn Atyraý munaı óńdeý zaýyty aıaqtaıtyn bolady. Qondyrǵylardy mehanıkalyq aıaqtaý osy jyldyń sońynda kútilýde. Pavlodar munaı hımııasy zaýyty men men Shymkent munaı óńdeý zaýytyn rekonstrýktsııalaý jáne jańǵyrtý jumystaryn mehanıkalyq aıaqtaý 2017 jylǵa josparlanǵan», - dedi M.Myrzaǵalıev.