Atyraý munaı óńdeý zaýyty zııandy qaldyqty tabıǵatqa tastaǵan
14:00, 02 Qarasha 2020
ATYRAÝ. QazAqparat – «Atyraý munaı óńdeý zaýyty» JShS aǵyn sý shyǵaryndylary núktesinde quramynda munaı ónimderi kóp qaldyq tastalǵany anyqtaldy. Bul týraly QR Ekologııa, geologııa jáne tabıǵı resýrstar mınıstrligi Facebook paraqshasynda jazdy, dep habarlaıdy QazAqparat.
«Atyraý oblystyq ekologııa departamenti jergilikti qoǵam ókilderimen birge Atyraý qalasynyń qorshaǵan orta jaǵdaıyna monıtorıng júrgizdi. Tekserý barysynda «Atyraý munaı óńdeý zaýyty» JShS aǵyn sý shyǵaryndylary núktesinde quramynda munaı ónimderi kóp qaldyq tastalǵany anyqtaldy» delingen habarlamada.
Jyldam áreket etý maqsatynda oblystyq ekologııa departamentiniń zerthana-saraptama bólimi qaldyqtardan synama aldy. Alynǵan synama ári qaraı analız júrgizýge jiberilgen.
Eske sala ketelik, budan buryn Atyraý munaı óńdeý zaýytynyń bıologııalyq tazartý qurylǵysynan aqaý shyqqanyn habarlap edik.