Atyraý munaı óńdeý zaýyty janarmaı qoryn jasaqtap jatyr
Zaýyttyń bas dırektory Murat Dosmuratovtyń málimetinshe, negizgi maqsat – ónerkásiptik qaýipsizdik talaptaryna jáne jabdyqtar men qubyrlardy, elektr jabdyqtaryn, tehnologııalyq protsesterdi basqarýdyń avtomattandyrylǵan júıesin, baqylaý-ólsheý aspaptaryn kýálandyrýǵa baılanysty josparly jóndeý júrgizý.
«Bizdiń zaýytta munaıdy qaıta óńdeýdiń eki aǵyndy tizbegi bar. Bul nysandardyń kezekpen toqtatylyp, iske qosylýyna yqpal etedi. Energetıka mınıstrligi bekitken kestege sáıkes jóndeý júrgizý kezinde zaýyttyń 50-70% qýaty jumysyn jalǵastyra beredi. Bul kezde zaýyt jumysy tolyǵymen toqtatylmaıdy», -deıdi Murat Dosmuratov.
Onyń aıtýynsha, qondyrǵylardyń jobalyq kórsetkishterine qol jetkizý, ekologııalyq parametrlerdi jaqsartý, avtomattandyrý quraldaryn retke keltirý úshin tehnologııalyq, kompressorlyq jáne dınamıkalyq jabdyqty qaýipsiz ári senimdi paıdalanýdy qamtamasyz etý ónerkásiptik qaýipsizdik talaptaryna sáıkes atqarylady. Jóndeý kezinde katalızatorlardy aýystyrý, ishki ınspektsııa, reaktorlyq, ydystyq, kolonnalyq, jylý almasý jabdyǵy men qubyr joldaryn tekserý jáne kýálandyrý júrgiziledi.
«Tehnologııalyq nysandar kezeń-kezeńimen jóndelip, zaýytty turaqty jumys rejımine kóshirý qarashanyń birinshi onkúndigine deıin júzege asyrylady. Otandyq naryqta janar-jaǵarmaı maıdyń tapshylyǵyn boldyrmaý úshin Atyraý munaı óńdeý zaýyty jóndeý júrgizý bastalǵanǵa deıin qajetti rezerv daıyndaıdy. Sol sebepten, qyrkúıek aıyna áleýmettik mańyzy bar munaı ónimderiniń qoryn jasaqtaý kózdelip otyr. Onyń ishinde 75 myń tonna avtokólik janarmaıy, 115 myń tonna dızel otyny, 6 myń tonna reaktıvti otyn, 5 myń tonna suıytylǵan gaz bar», -dep málim etti Murat Dosmuratov.
Eske sala ketelik, budan buryn elimizde janarmaı túrleriniń shekti baǵalary ózgerissiz qalǵanyn jazǵan edik.