Atyraý munaı óńdeý zaýyty suıytylǵan gazdy kólikpen áketýge tyıym salǵan joq

Atyraý munaı óńdeý zaýyty suıytylǵan gazdy kólikpen alyp ketýdi shekteýge baılanysty aqparatty joqqa shyǵardy, dep habarlaıdy QazAqparat tilshisi.

«AMÓZ» JShS qoǵammen baılanys toby bul aqparattyń shyndyqqa janaspaıtynyn resmı málimdedi.

«Birqatar buqaralyq aqparat quralynda «AMÓZ» JShS BQO jáne Atyraý oblysyna suıytylǵan gazdy avtokólikpen alyp ketýdi shektedi degen aqparat tarady. Bul aqparattyń shyndyqqa janaspaıtynyn resmı túrde habarlaımyz. Zaýyt táýligine 500-550 tonna suıytylǵan gaz óndiredi. Energetıka mınıstrligi bekitken 2023 jyldyń qyrkúıek aıyna arnalǵan jetkizý josparyna sáıkes Atyraý oblysyna 5 064 tonna, Batys Qazaqstan oblysyna 2 940 tonna suıytylǵan gaz bólindi. Keshe, 13 qyrkúıektegi málimetke sáıkes Atyraý oblysyna 3 236 tonna, ıaǵnı josparlanǵan kólemniń 64%, BQO-ǵa 1 288 tonna – 44% kóleminde suıytylǵan gaz jóneltildi», -dep habarlady kompanııanyń qoǵammen baılanys bólimi.

AMÓZ-de suıytylǵan gaz Energetıka mınıstrliginiń josparyna saı jóneltilip jatyr.

Óndiris qalypty jumys istep tur. Suıytylǵan gazdyń tıisti kólemi shektelgen joq.

Eske sala ketelik, buǵan deıinAtyraý munaı óńdeý zaýyty K5 klasyndaǵy benzındi jónelte bastaǵanyn habarlaǵan edik.

K5 standartty benzınin shyǵarýǵa zaýyttaǵy úsh kezeńdi jańǵyrtý aıasynda jańa tehnologııalyq qondyrǵylardy iske qosýdyń nátıjesinde qol jetti.

Atyraý munaı óńdeý zaýytynda K5 standartymen AI-92 avtobenzınin óndirýdiń ortasha táýliktik kórsetkishi 5,5 myń tonnany quraıdy.