Atyraý munaı óńdeý zaýyty K5 klasyndaǵy benzındi jónelte bastady
«AMÓZ» JShS-niń qoǵammen baılanys bóliminen málim etkendeı, bıylǵy shildede zaýytta Eýro-5 ekologııalyq taza benzıniniń balamaly túri K5 klasyndaǵy AI-92 janarmaıyn shyǵarý bastalǵan.
Bul – «QazMunaıGaz» UQ AQ qorshaǵan ortaǵa shyǵarylatyn zııandy zattar kólemin azaıtýǵa baǵyttalǵan is-sharasy aıasynda qolǵa alynǵan janarmaı. Atalǵan ekologııalyq otynnyń quramyndaǵy kúkirtti qosylystardyń kórsetkishi K4 klasymen salystyrǵanda 5 ese az. Onyń quramynda benzol tektes hosh ıisti kómirsýtekter men ózge de qospalardyń mólsheri shekteýli. K5 klasyndaǵy otyndy paıdalaný kezinde ýly zattardyń shyǵaryndylaryn azaıtý adam densaýlyǵyna zııandy áserdi, onyń ishinde titirkený men tynys alý organdarynyń aýrýlaryn, qabyný protsesin, júıke jáne júrek-tamyr júıesine keri áserlerdi azaıtýǵa septigin tıgizedi», -dep habarlady kásiporynnyń qoǵammen baılanys bólimi.
Zaýyt mamandarynyń túsindirýinshe, K5 klasty benzındi paıdalaný avtokólikterdiń jumysyna oń áser etedi.
«K5 standartty benzınin shyǵarýǵa zaýyttaǵy úsh kezeńdi jańǵyrtý aıasynda jańa tehnologııalyq qondyrǵylardy iske qosýdyń nátıjesinde qol jetti. Qazir Atyraý munaı óńdeý zaýytynda K5 standartymen AI-92 avtobenzınin óndirýdiń ortasha táýliktik kórsetkishi 5,5 myń tonnany quraıdy», -dep málim etti qoǵammen baılanys bóliminen.
Eske sala ketelik, buǵan deıin elektr qýatynyń joqtyǵynan Atyraý munaı óńdeý zaýyty jumysyn toqtatqanyn jazǵan edik.
Keıin janar-jaǵarmaı ónimderin shyǵarý jumystary qaıta jandanǵanyn habarlaǵan bolatynbyz.