Atyraý men Mańǵystaýda polıtsııa qamqorlyq etken qylmystyq toptar anyqtaldy

ASTANA. QazAqparat - Atyraý men Mańǵystaý oblystarynda polıtsııa qyzmetkerleriniń qamqorlyǵymen jumys istegen qylmystyq toptar anyqtaldy, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Atalmysh málimet Bas prokýratýrada zańsyz ańshylyqqa qarsy is-qımyldyń tıimdi sharalaryn ázirleý máselesi boıynsha vedomstvoaralyq jınalysynda málim etildi.
Jıynǵa Aýyl sharýashylyǵy, Іshki ister, Qarjy mınıstrlikteriniń, UQK Shekara qyzmetiniń jáne Sybaılas jemqorlyqqa qarsy is-qımyl jónindegi ulttyq bıýronyń jaýapty ókilderi qatysqan.
Onda sońǵy jyldary elimizde sırek kezdesetin jáne joıylyp bara jatqan janýarlar zańsyz aýlaýǵa qatysy oqıǵalary jıilep ketkeni atap ótildi.
3 jylda osyndaı qylmystyq áreketterdiń saldarynan tabıǵatqa keltirilgen zalal 3,6 mlrd teńge qurady.
Kıikterdi atýǵa qatysty oqıǵa kóbeıip ketken. Tek 2016-2018 jyldardyń ózinde 3 myńǵa jýyq kıik atylǵan.
«Brakonerlerdiń qylmystyq áreketi uıymdasqan túrde jáne turaqty sıpat alýda.
Buǵan Qaraǵandy oblysyndaǵy «Ohotzooprom» RMK ınspektorynyń qaza bolýyna baılanysty oqıǵa dálel», - delingen habarlamada.
Vedomstvonyń málimeýinshe, osyǵan uqsas oqıǵalar bekire tuqymdas balyqtardy aýlaýǵa baılanysty da oryn alyp otyr.
«2018 jyly zańsyz aınalymnan 8 myń kelige jýyq bekire alyndy, alaıda kóbisi kóleńkede qalyp otyr», - delingen habarlamada.
Keńeste quqyq qorǵaý jáne tabıǵat qorǵaý organdarynyń áreketteri tıimsiz ekeni jáne zańsyz ań aýlaýǵa qarsy kúreste keshendi sharalar ázirleýdi talap etetini atap ótildi.
«Qyzmet boryshy boıynsha janýarlar álemin saqtaýǵa mindetti ýákiletti jáne quqyq qorǵaý organdary qyzmetkerleriniń qylmys jasaý faktileri de beleń alǵan.
Aǵymdaǵy jyly Atyraý men Mańǵystaý oblystarynda balyq ınspektsııasy men polıtsııa qyzmetkerleriniń qamqorlyǵymen jumys istegen qylmystyq toptardyń áreketterine tuzaq salyndy», - delingen habarlamada.
Jıynda tabıǵat qorǵaý ınspektorlaryn qorǵaýdy qamtamasyz etý jáne quqyqtyq mártebesin bekitý máselesi de qozǵaldy. Osyǵan oraı qarastyrylyp otyrǵan saladaǵy ahýaldy jaqsartý jóninde birqatar usynymdar ázirlendi.
«Jınalystyń nátıjesi boıynsha brakonerlerdiń áreketteriniń jolyn kesýge, bıorestýrstardy zańsyz satyp alýǵa, tasymaldaýǵa jáne onyń eksportyna jol bermeýge baǵyttalǵan birlesken is-sharalar jospary ázirlendi», - delingen habarlamada.