Atyraý men Ázerbaıjan arasyndaǵy syrtqy saýda aınalymy 4,8 mln dollarǵa jetti
Bul týraly oblys ákimi Serik Shápkenov pen Ázerbaıjan Respýblıkasynyń Aqtaý qalasyndaǵy bas konsýly Elmar Mammadovtyń kezdesýinde belgili boldy.
Kezdesýde ekonomıkalyq baılanystardy odan ári nyǵaıtý, birneshe salada alys-beristi artyrý, óńiraralyq kásipkerlikti damytý máselesi talqylandy.
Oblys ákimi Serik Shápkenovtiń aıtýynsha, Ázerbaıjan Respýblıkasy Atyraý oblysynyń syrtqy saýda baılanysynda mańyzdy rol atqaryp otyr. Bıylǵy jyl basynan beri Atyraý oblysy men Ázerbaıjan Respýblıkasy arasynda syrtqy saýda aınalymy 4,8 mln AQSh dollaryn quraǵan. Onyń ishinde eksporttyń úlesi 462,2 myń AQSh dollaryna, al, ımport 4,3 mıllıon AQSh dollaryna jetken.
«Qazir Atyraý oblysynyń kólik, azyq-túlik, kóterme saýda salasynda Ázerbaıjan Respýblıkasynyń kapıtaly salynǵan 90 kásiporyn jumys isteıdi. Biz mundaı iskerlik baılanysty jandandyra túsip, birlesken jobalardy júzege asyrýdyń jańa formatyn izdestirýimiz qajet. Bul ekonomıkalyq, iskerlik qarym-qatynasty nyǵaıtýǵa yqpal etedi», -dedi SErik Shápkenov.
Eske sala ketelik, buǵan deıin Atyraý oblysynda Ózbekstannyń 91 kásiporny jumys isteıtinin habarlaǵan bolatynbyz.