Atyraý mektepteriniń qaýipsizdik deńgeıi bir aı boıy tekseriledi
Atyraý oblystyq Bilim basqarmasynyń basshysy Gúlnar Sádýaqasovanyń aıtýynsha, 2022-2023 oqý jyly bastalǵanǵa deıin mektepter, balabaqshalar men kolledjder qaýipsizdik qurylǵysymen tolyqtaı qamtamasyz etilgen.
«Ulttyq bilim berý derekteriniń qoryndaǵy málimetterge sáıkes oblystyń bilim salasyndaǵy 214 nysan 9 668 kameramen jabdyqtalǵan. Al 77 mekteptiń 501 kamerasy jedel basqarý ortalyǵyna qosyldy. Biraq 22 bilim berý nysany ıntegratsııa ornatýǵa sáıkes kelmeıdi. Byltyr bilim berý nysandaryna «Dabyl túımesin» ornatý úshin jergilikti bıýdjetten 88 mln teńge qarjy qaraldy. Qazir 200 mektepte «dabyl túımesi» bar. Qazir mektepterde 305 kamerany aýystyrý qajettigi týyndady. Іsten shyqqan kameralar aýystyrylyp jatyr. Soǵan baılanysty jańa kameralarǵa tapsyrys berildi», - dep habarlady Gúlnar Sádýaqasova.
Oblys ákimi Serik Shápkenov sala mamandaryna arnaıy komıssııa qurýdy júktedi. Arnaıy komıssııa músheleri bir aı ishinde bilim berý nysandaryndaǵy qaýipsizdik deńgeıin tekseredi.
«Máseleniń bárin qarajatqa tireýdiń jóni joq. Balalardyń qaýipsizdigin tolyq qamtamasyz etý úshin qajetti qarjy bólindi. Endi árbir bilim berý nysandarynda barlyq qaýipsizdik sharasyna nazar aýdarý kerek. Óıtkeni, balanyń qaýipsizdigi qarajatpen ǵana shektelmeıdi. Balalarymyz qaýipsiz ortada alańsyz ómir súrýi úshin tárbıe jumysyn kúsheıtýdiń mańyzy zor. Buǵan tıisti salanyń, mektepter men kolledjderdiń basshylary, ata-ana, jalpy bárimiz nazar aýdarýymyz qajet», - dedi Serik Shápkenov.
Eske sala ketelik, buǵan deıin Atyraý mektepteriniń kúzetine eki jylda 88 mln teńge jumsalǵanyn jazǵan bolatynbyz.