Atyraý mańyndaǵy aýyl turǵyndary oblys ákimine problemalaryn aıtty

ATYRAÝ. QazAqparat – Atyraý qalasynyń mańyndaǵy aýyl turǵyndary oblys ákimine problemalaryn aıtty, dep habarlaıdy QazAqparat.

Atyraý oblysynyń ákimi Mahambet Dosmuhambetov Damby aýyldyq okrýginiń turǵyndarymen kezdesti.

Tórt myńǵa jýyq turǵyny bar okrýgke Damby jáne Amangeldi aýyldary qaraıdy.

Oblys ákimi aldymen aýyl turǵyndaryn jeke máseleleri boıynsha qabyldady. Turǵyndar ózderi turatyn aýyldardyń áleýmettik-ekonomıkalyq máselelerin qozǵady.

Máselen, balyq sharýashylyǵy salasynyń ardageri Sanat Tilepbergenovtiń aıtýynsha, aýylǵa ambýlatorııa qajet.

«Damby dárigerlik ambýlatorııasynyń bólimshesi – Amangeldi feldsherlik-akýsherlik pýnkti 1957 jyly salynǵan. Qazir bul ǵımarat tozyp, emdelýge kelgen turǵyndar úshin yńǵaısyzdyq týǵyzyp otyr. Sol sebepten, 15-20 oryndyq jańa ǵımarat qajet», -deıdi Sanat Tilepbergenov.

Okrýg ákimi Uzaqbaı Baızýllınniń aıtýynsha, byltyr Damby–2 aýylyndaǵy 7 kóshege 2,2 shaqyrym jol salynǵan.

Qazir okrýgtegi 27 kóshege tolyq asfalt tóselgen. Sondaı-aq, memleket-jekemenshik áriptestigimen 9 kóshege túngi jaryq júrgizilgen.

Okrýgtiń taǵy bir turǵyny Sveta Óteǵalıeva jeke kásip ashqysy keledi. Alaıda, qujat jınaýdyń qıyndyǵyna tap bolǵan.

Ózge turǵyndar Jaıyq ózeniniń túbin tereńdetý, balyq ósirýdi damytý máseleleri sheshimin tapqanyn qalaıdy.

«Sizder kótergen máseleniń bári el áleýetin arttyrý úshin mańyzdy dep esepteımin. Keıbir máseleni ózimiz sheship bere alamyz. Alaıda, birqatar máseleniń Úkimet deńgeıinde sheshiletinin eskerýimiz kerek», -dedi Mahambet Dosmuhambetov.